कोभिड–१९ को सङ्क्रमणसम्बन्धी दैनिक अपडेट (मङ्सिर १२ गते)

मङ्सिर १२ गते १ हजार ७ सय ३ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख २९ हजार ३ सय ४३ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १० हजार ४ सय ६० ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख १० हजार ६ सय ७१ जना निको भएका छन् । मङ्सिर १२ गते १ हजार २ सय ३६ जना निको भएका छन् भने निको हुनेको दर ९१.९ प्रतिशत रहेको मन्त्रालयले जनाएको छ । मङ्सिर १२ गतेसम्म १ हजार ४ सय ३५ जना कोभिड सङ्क्रमितको मृत्यु भएको मन्त्रालयले जनाएको छ । १७ हजार २ सय ३७ जनाको उपचार भइरहेको छ । १० हजार ९ सय ४४ जना होम आइसोलेशनमा छन् भने ३ सय ५४ जनाको उपचार आइसीयूमा र ५४ जनाको उपचार भेण्टिलेटरमा भइरहेको छ । मन्त्रालयका अनुसार मनाङ र डोल्पामा सक्रिय सङ्क्रमित छैनन् भने काठमाडौँ, ललितपुर, भक्तपुर र कास्कीमा ५ सयभन्दा बढी सक्रिय सङ्क्रमित छन् ।

गण्डकी प्रदेश
तनहुँ प्रतिनिधि प्रकाशचन्द्र भट्टराईका अनुसार वडा कार्यालय नजिकै घर भएका एक पुरुषको कोभिड–१९ को कारण मृत्यु भएपछि म्याग्दे गाउँपालिका–७ को सेवा मङ्सिर १८ गतेसम्मका लागि बन्द गरिएको छ । वडा कार्यालयले एक सूचना प्रकाशन गरी मङ्सिर १२ गतेदेखि १८ गतेसम्म वडा कार्यालयको सेवा बन्द गरिएको वडा अध्यक्ष पद्मराज वाग्लेले बताउनुभयो । मृतकको परिवार र उनका नजिकका व्यक्तिको कन्ट्याक्ट ट्रेसिङ गरी स्वाब परीक्षण गरेर रिपोर्ट नआउँदासम्म वडा कार्यालयबाट प्रवाह हुने सम्पूर्ण सेवा बन्द गर्ने निर्णय गरिएको गाउँपालिकाका प्रमुख प्रशासकीय अधिकृत नारयणप्रसाद अधिकारीले बताउनुभयो ।

सुदूरपश्चिम प्रदेश
बैतडी प्रतिनिधि नरी बडुका अनुसार डिलाशैनी गाउँपालिका–३ स्थित एक प्रहरी चौकीमा कार्यरत सबै नौ जना प्रहरीमा कोभिड पुष्टि भएपछि सो चौकी बन्द गरिएको छ । सो प्रहरी चौकीबाट प्रदान गरिने सेवा ठप्प भएको छ । सो चौकीमा कार्यरत सबै प्रहरीमा कोभिड पुष्टि भएको जिल्ला प्रहरी कार्यालयका डिएसपी नारायणप्रसाद अधिकारीले जानकारी दिनुभयो । प्रहरी चौकीमा कार्यरत सबै प्रहरीमा कोभिड देखिएपछि चौकीलाई नै आइसोलेशनको रुपमा प्रयोग गरिएको उहाँले बताउनुभयो । सक्रिय सङ्क्रमितमध्ये सबैभन्दा बढी दशरथचन्द नगरपालिकामा १८, डिालाशैनी गाउँपालिकामा १०, पुर्चौडी नगरपालिकामा चार र सुर्नया, पञ्चेश्वर र दोगडाकेदारमा एक/एक जना रहेका छन् ।


अनलाइन डेस्क