समाचारहरू

मङ्सिर ४ गते २ हजार १ सय ३ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख १५ हजार २० पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ९ हजार ८ सय ५ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये १ लाख ८५ हजार ६ सय ३८ जना निको भएका छन् । मङ्सिर ४ गते २ हजार ८ सय ५८ जना निको भएका छन् भने निको हुनेको दर ८६.३ प्रतिशत रहेको मन्त्रालयले जनाएको छ । मङ्सिर ४ गतेसम्म १ हजार २ सय ७६ जना कोभिड सङ्क्रमितको मृत्यु भएको मन्त्रालयले जनाएको छ । २८ हजार १ सय ६ जनाको उपचार भइरहेको छ । २५ हजार ३ सय ४७ जना होम आइसोलेशनमा छन् भने ३ सय ८० जनाको उपचार आइसीयूमा र ६२ जनाको उपचार भेण्टिलेटरमा भइरहेको छ ।

कर्णाली प्रदेश
रुकुम (पश्चिम) प्रतिनिधि मनिषा केसीका अनुसार कोभिड–१९ को सङ्क्रमण देखिएपछि जिल्ला प्रशासन कार्यालय रुकुम (पश्चिम)ले मङ्सिर ४ गते बिहान १० बजेदेखि अर्को सूचना जारी नभएसम्मका लागि मुसीकोट नगरपालिका–१ सल्लेमा सील गरेको छ । पछिल्लो परीक्षणमा मुसीकोट नगरपालिका–१ सल्लेका दुई जना व्यक्तिमा कोभिड–१९ को सङ्क्रमण देखिएपछि जिल्ला प्रशासन कार्यालयले चार किल्ला तोकी निषेधाज्ञा गरेको हो । कोभिड–१९ लाई थप फैलिन नदिन पूर्वमा मुलखोला, पश्चिममा गुजिलढुङ्गा, उत्तरमा सल्ले माथिको डाँडा र दक्षिणमा सल्ले विमानस्थल क्षेत्रभित्र अति आवश्यक बाहेक अन्य सेवा ठप्प रहने गरी सील गर्ने निर्णय गरिएको प्रमुख जिल्ला अधिकारी बद्रिनाथ गैह्रेले जानकारी दिनुभयो । अस्पतालमा इमरजेन्सी सेवा र प्रसूति सेवा बाहेकका सेवा बन्द गरिएको निमित्त स्वास्थ्य सेवा व्यवस्थापक डाक्टर छविलाल नेपालीले जानकारी दिनुभयो । इमन्र्जेनसी वार्डमा उपचाररत दुई जनामा कोभिड सङ्क्रमण देखिएको र उनीहरुको उपचारमा संलग्न चिकित्सक र पारामेडिक्स समेत प्रत्यक्ष सम्पर्कमा रहेकोले इमरजेन्सी र प्रसूति बाहेकका सेवा बन्द गरिएको उहाँले बताउनुभयो ।
हुम्ला प्रतिनिधि नन्द सिंहका अनुसार सिमकोट गाउँपालिका–७ डाँडाफयाका एक जना शिक्षक एक हप्तादेखि कोभिड सङ्क्रमणको आशङ्कामा त्रिपालको क्वारेण्टाइनमा बस्न बाध्य भएका छन् । नाम्खा गाउँपालिका–४ को माहवौद्ध माविमा कार्यरत शिक्षकलाई कोभिडको आशङ्कामा धारापोरी प्रहरीचौकी र ७ नम्वर वडा कार्यालयको समन्वयमा अत्याधिक चिसोको मौसममा पनि त्रिपालको क्वारेण्टाइनमा राखिएको हो । यसरी त्रिपालमुनि बसेको सात दिन भइसक्दा पनि स्वास्थ्य संस्था र गाउँपालिकाले पीसीआर परीक्षण नगरेको उनले गुनासो गरेका छन् । स्वास्थ्य सेवा कार्यालय हुम्लाका कार्यालय प्रमुख प्रेमबहादुर सिंहले हालसम्म जानकारी नभएको बताउनु भयो । सिमकोट गाउँपालिकाका अध्यक्ष पदमबहादुर लामाले पनि जानकारी नभएको बताउनु भयो ।
लामो समयको बन्दाबन्दीपछि दशैँ लगत्तै सञ्चालनमा आएका हुम्लाका शैक्षिक संस्थाहरु मङ्सिर ४ गतेदेखि पुनः बन्द गरिएको छ । कोभिड–१९ को सङ्क्रमणको जोखिमलाई मध्यनजर गर्दै मङ्सिर ४ गतेदेखि जिल्लाका सातओटै स्थानीय तहमा रहेका सबै सामुदायिक तथा संस्थागत विद्यालयमा अर्को व्यवस्था नहुँदासम्मका लागि बन्द गरिएको हो । नाम्खा गाउँपालिकाको याल्वाङमा रहेको महाबौद्ध माध्यमिक विद्यालयमा ५१ विद्यार्थीमा कोभिड सङ्क्रमण पुष्टि भएपछि जिल्लाभरका शैक्षिक संस्था बन्द गरिएको हो । मङ्सिर ३ गते बसेको जिल्ला कोभिड–१९ सङ्कट व्यवस्थापन समितिको बैठकले जिल्लाभरका शैक्षिक संस्था बन्द गर्ने, बाहिरी जिल्लाबाट आउनेहरूले पीसीआर रिपोर्ट नल्याएमा प्रवेशमा रोक लगाउने र अन्तर स्थानीय तह आवतजावतमा समेत कडाइ गर्नेलगायतका निर्णयहरू गरेको छ ।

अनलाइन डेस्क