समाचारहरू

कात्तिक २९ गते १ हजार ९ सय ४६ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ८ हजार २ सय ९९ पुगेको स्वास्थ्य तथा जनसङ्ख्या मन्त्रालयले जनाएको छ । सङ्क्रमितमध्ये महिला ३४ प्रतिशत रहेका मन्त्रालयले जनाएको छ । गत २४ घण्टामा ८ हजार ७ सय ५३ जनाको स्वाब परीक्षण गरिएको मन्त्रालयले जनाएको छ । सङ्क्रमितमध्ये १ लाख ७० हजार ६ सय ३२ जना निको भएका छन् । कात्तिक २९ गते २ हजार ५ सय ३ जना निको भएका छन् भने निको हुनेको दर ८१.९ प्रतिशत रहेको मन्त्रालयले जनाएको छ । कात्तिक २९ गतेसम्म १ हजार २ सय १५ जना कोभिड सङ्क्रमितको मृत्यु भएको मन्त्रालयले जनाएको छ । ३६ हजार ४ सय ५२ जनाको उपचार भइरहेको छ । ७ हजार ७ सय २० जना होम आइसोलेशनमा छन् भने ३ सय ७६ जनाको उपचार आइसीयूमा र ७४ जनाको उपचार भेण्टिलेटरमा भइरहेको छ ।

गण्डकी प्रदेश

तनहुँ प्रतिनिधि प्रकाशचन्द्र भट्टराईका अनुसार कात्तिक २८ गते कर्मचारीमा सङ्क्रमण बढेको भन्दै व्यास नगरपालिकाले आगामी मङ्सिर ५ गतेसम्म नगरपालिका बन्द गर्नेे निर्णय गरेको छ । नगरपालिकामा मङ्सिर २ गतेसम्म तिहार बिदा हुने भएपनि नगरपालिकाले कोभिड सङ्क्रमण कम गर्न र कन्ट्याक्ट ट्रेसिङमा परेका कर्मचारीको स्वाब परीक्षणका लागि मङ्सिर ५ गतेसम्म बन्द गर्ने निर्णय गरेको नगरपालिकाका प्रमुख प्रशासकीय अधिकृत डिल्लीराम सिग्देलले बताउनुभयो । नगरपालिकाको कार्यालय, सबै वडा कार्यालय र अन्य कार्यालयहरु तथा अत्यावश्यक बाहेकका सेवा बन्द गरिने सिग्देलले बताउनुभयो । नगरपालिकाले सङ्क्रमित कर्मचारीको सम्पर्कमा रहेका कर्मचारी तथा अन्य सर्वसाधरणलाई स्वाब परीक्षण गर्न अनुरोध समेत गरेको छ ।

कर्णाली प्रदेश
सल्यान प्रतिनिधि मीना बुढाथोकीका अनुसार सल्यानको प्रमुख व्यापारिक केन्द्र श्रीनगर बजार एक साताको लागि सील गरिएको छ । बजार आसपासको नागरिकमा कोभिड–१९ को सङ्क्रमण पुष्टि भएपछि जोखिम उच्च भएकाले एक साताका लागि श्रीनगर बजार पूर्ण रुपमा सील गरिएको हो । कात्तिक २९ गतेदेखि मङ्सिर ६ गतेसम्मका लागि स्वास्थ्य सेवा, पेट्रोल पम्प, बैङ्क बाहेकका सबै खाले क्षेत्र तथा सेवाहरू सील गरिएको शारदा नगरपालिका–१ का अध्यक्ष नवराज बुढाथोकीले जानकारी दिनुभयो । शारदा नगरपालिकाको कार्यालयको सिफारिस अनुसार जिल्ला सुरक्षा समिति सल्यानले सील गर्ने निर्णय गरेको हो । शारदा नगरपालिका–१ को चैवाङ जिउला, शान्तिनगर, श्रीनगर बजार, छापडाँडा, दारिम्चौर, पट्नेरी, वडा नम्बर २ को जोगिदेउखोला, वडा नम्बर ६ को बरलासम्मको क्षेत्र सील गरिएको बुढाथोकीले बताउनु भयो । श्रीनर आसपासको क्षेत्रका ४६ जनाको स्वाब सङ्कलन गरेर परीक्षण गर्दा ३३ जनाको रिपोर्ट पोजिटिभ आएको थियो ।

अनलाइन डेस्क