समाचारहरू

कात्तिक २ गते २ हजार ९ सय ४२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ३२ हजार २ सय ४६ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १४ हजार ८ सय ७५ जनाको स्वाब परीक्षण गरिएको मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार कात्तिक २ गतेसम्म ७ सय ३९ जना कोभिड–१९ सङ्क्रमितको मृत्यु भएको छ । सङ्क्रमितमध्ये ९२ हजार १ सय ६६ जना निको भएका छन् । कात्तिक २ गते २ हजार ३ सय २६ जना निको भएका छन् भने निको हुनेको दर ६९.७ प्रतिशत रहेको मन्त्रालयले जनाएको छ । ३९ हजार ३ सय ४१ जनाको उपचार भइरहेको छ । मन्त्रालयका अनुसार २६ हजार ४ सय ८ जनाको उपचार होम आइसोलेशनमा भइरहेको छ । ३ सय १ जनाको उपचार आइसीयूमा र ६६ जनाको उपचार भेण्टिलेटरमा भइरहेको छ ।

प्रदेश १
मोरङ प्रतिनिधि नेत्रप्रसाद अधिकारीका अनुसार जिल्ला प्रशासन कार्यालयले दशैँको समयमा कोभिड–१९ को संक्रमण फैलिन सक्ने भन्दै कात्तिक २ गते निषेध आदेश जारी गरेको छ । कात्तिक ३ गते मध्यरातदेखि कात्तिक १५ गते मध्यरातिसम्म निषेध आदेश जारी गरिएको प्रमुख जिल्ला अधिकारी कोषहरि निरौलाले बताउनु भयो । आदेशमा मठ मन्दिरमा भेला भई पुजा र भजनकिर्तन गर्न बर्जित गरिएको छ । सामूहिक शुभकामना आदानप्रदान कार्यक्रम रोक लगाएको प्रमुख जिल्ला अधिकारी निरौलाले बताउनु भयो । कोभिड–१९ को सङ्क्रमण दिनप्रतिदिन बढेपछि निषेध जारी गरेको प्रशासनले जनाएको छ । जिल्लामा कात्तिक २ गतेसम्म कोभिड–१९ सङ्क्रमितको सङ्ख्या ६ हजार ६ सय २४ पुगेको छ । जसमध्ये २ हजार ७ सय ४२ जना निको भएका छन् ।

गण्डकी प्रदेश
म्याग्दी प्रतिनिधि अमृतप्रसाद पौडेलका अनुसार म्याग्दीको मङ्गला गाउँपालिकामा कार्यरत एक जना कर्मचारीमा कोभिड–१९ को सङ्क्रमण भएपछि अत्यावश्यक बाहेकका काम बन्द गरिएको छ । गाउँपालिका कार्यालयबाट प्रदान हुने अत्यावश्यक बाहेक सबै कार्य कात्तिक २ गतेबाट अर्को सूचना नभएसम्मका लागि बन्द गरिएको जानकारी जिल्ला प्रशासन कार्यालय म्याग्दीका सहायक प्रमुख जिल्ला अधिकारी माया कुँवरले बताउनुभयो ।

अनलाइन डेस्क