समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा ५ सय जना कोभिड–१९ का सङ्क्रमित थपिएका छन् । एक सातामा ४ सय ७४ जना सङ्क्रमित निको भए भने तीन जनाको मृत्यु भएको पनि मन्त्रालयले जनायो । यो अवधिमा २१ हजार ४ सय ८७ ओटा स्वाब परीक्षण गरिएको थियो ।

प्रदेश १
स्वास्थ्य तथा जनसङ्ख्या मन्त्रालयका अनुसार ०७७ फागुन २५ गतेदेखि चैत २ गतेसम्मको अवधिमा झापामा तीन जना पुरूषमा कोभिड–१९ को सङ्क्रमण पुष्टि भएको छ । त्यसैगरी सुनसरीमा एक जना पुरूष, खोटाङमा दुई जना पुरूष र एक जना महिला गरी तीन जना, मोरङमा सात जना पुरूष र सात जना महिला गरी १४ जना, ओखलढुङ्गामा एक जना पुरूष, पाँचथरमा एक जना पुरूष र तेहृथुममा एक जना पुरूष गरी २४ जनामा कोभिड–१९ को सङ्क्रमण पुष्टि भएको छ । प्रदेश १ मा रहेका कोशी कोभिड–१९ अस्पताल, प्रदेश जनस्वास्थ्य प्रयोगशाला,वीपी कोइराला स्वास्थ्य विज्ञान प्रतिष्ठान घोपा प्रयोगशाला, मेची अस्पताल प्रयोगशाला, कोटीहोम प्रयोगशाला, नोवेल अस्पताल प्रयोगशाला, विराट अस्पताल प्रयोगशाला र न्यूरो अस्पताल प्रयोगशालामा गरिएको कोभिड–१९ को परीक्षणमा प्रदेश १ मा एक साताको अवधिमा प्रदेश १ मा २४ जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । भोजपुर,सोलुखुम्बु, धनकुटा, इलाम, सङ्खुवासभा,ताप्लेजुङ र उदयपुरमा यो साता कोभिड–१९ सङ्क्रमित फेला नपरेको मन्त्रालयले जनाएको छ ।

बागमती प्रदेश

 यस प्रदेशमा फागुन २ गते कोभिड–१९ सङ्क्रमणको सङ्ख्या जम्मा १ लाख ५१ हजार ७ सय ६५ जना पुगेको छ । अघिल्ला हप्ता १ लाख ५१ हजार ४ सय ४३ जना कोभिड–१९ सङ्क्रमित रहेकोमा यस हप्ता ३ सय २२ जना मात्र सङ्क्रमित थपिएका हुन् ।   यस प्रदेशका कूल सङ्क्रमितमध्ये १ लाख ५० हजार ३ सय ६६ जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा ३ सय ५५ जना उपचाररत रहेका छन् । अघिल्लो हप्ता सक्रिय सङ्क्रमतिको सङ्ख्या ३ सय ९६ जना रहेकोमा यो हप्ता ४१ जना कम भई ३ सय ५५ जनामा झरेको हो ।
फागुन २ गतेसम्म मृत्यु हुनेको सङ्ख्या भने १ हजार १४ जना पुगेको छ । यो अघिल्लो हप्ता भन्दा एक जनाले मात्रै बढी हो । यस प्रदेशमा कोभिड–१९ बाट मृत्यु हुनेको दर ०.६७ प्रतिशत रहेको छ ।  अघिल्लो साता ३९.४ प्रतिशत महिला र ६०.६ प्रतिशत पुरुष सङ्क्रमित भएकोमा फागुन २ गते पनि सोही अनुपातमा महिला र पुरुषको सङ्क्रमित प्रतिशत रहेको छ ।
बागमती प्रदेशमा अघिल्लो हप्ता देशको कूल सङ्क्रमणको सङ्ख्या ५४.७४ प्रतिशत रहेकोमा फागुन २ गते आइपुग्दा केही कम भई ५४.७० प्रतिशत भएको छ ।  यस प्रदेशमा कोभिड–१९ सङ्क्रमण पुष्टि भएका मध्येमा अघिल्लो हप्ता ९९.०७ प्रतिशतको हाराहारीमा निको हुनेको सङ्ख्या रहेकोमा फागुन २ गते आइपुग्दा यो सङ्ख्या बढेर ९९.१० प्रतिशत पुगेको छ ।  कोभिड १९ को विरुद्ध दोस्रो चरणको खोप कार्यक्रममा ४ लाख २७ हजार ९ सय ६६ जनालाई खोप उपलब्ध गराउने कार्यक्रम फागुन २३ गतेबाट सुरु भएकोमा यस प्रदेशमा फागुन २ गते आईपुग्दा लक्षको ५३.७६ प्रतिशत लक्ष पुरा भएको सामाजिक विकास मन्त्रालयले जनाएको छ ।

गण्डकी प्रदेश
गण्डकी प्रदेशमा फागुन २५ गतेबाट चैत २ गतेसम्म थप ८३ जनामा कोभिड–१९ सङ्क्रमण देखिएको छ । जसमध्ये ४१ जना पुरुष र ४२ जना महिला रहेका छन् । यो सगै प्रदेशमा कुल सङ्क्रमितको सङ्ख्या १८ हजार १ सय ६० रहेको छ ।

लुम्बिनी प्रदेश
लुम्बिनी प्रदेशमा यो साता महिला ४१ जना र पुरुष ३३ जना गरी ७४ जनामा कोभिड सङ्क्रमण पुष्टि भएको छ । यस साता सबै भन्दा बढी दाङ जिल्लामा २५ जनामा सङ्क्रण पुष्टि भएको छ । पछिल्लो २४ घण्टामा प्रदेशमा १ सय ९९ जनामा गरिएको परीक्षणमा  १० जनामा कोभिड पोजेटिभ देखिएको स्वास्थ्य मन्त्रालयको तथ्याङ्कले जनाएको छ । गत साता सङ्क्रमित हुनेको सङ्ख्या ६७ रहेको थियो । प्रदेशमासात जना पुरुष र तीन जना महिला गरी १० जना  सक्रिय सङ्क्रमित रहेका छन् । प्रदेश समाजिक विकास मन्त्रालय स्वास्थ्य निर्देशनालय बुटवलका अनुसार हालसम्म प्रदेशमा उपचारका लागि बाहिरबाट आएकासमेत गरी ४ सय ६ जनाको मृत्यु भएको छ । जसमध्ये तीन जनाले आत्महत्या गरेका थिए ।

सुदूरपश्चिम प्रदेश

स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा फागुन २५ गतेदेखि चैत २ गतेसम्म आठ जनामा सङ्क्रमण पुष्टि भएसँगै सङ्क्रमित हुनेको सङ्ख्या ५० पुगेको छ । चैत २ गते सुदूरपश्चिम प्रदेशका नौ जिल्लामध्ये कैलाली जिल्लामा मात्रै एक जना पुरुषमा कोभिड सङ्क्रमण पुष्टि भएको छ । सुदूरपश्चिम प्रदेशमा मृत्यु हुनेको सङ्ख्या ६७ जना पुगेको भएपनि यो साता कोभिडका कारण कसैको मृत्यु भएन । चैत २ गतेसम्म प्रदेशमा १४ हजार ९ सय ४८ जना सङ्क्रमित निको भएका छन् । हालसम्म सुदूरपश्चिम प्रदेशमा १५ हजार १८ जनामा कोभिड पुष्टि भएको छ । नेपाल सरकारले ०७७  फागुन  २३ गतेदेखि सुरु गरेको कोभिड–१९ विरुद्धको  दोस्रो चरणको खोप अभियान अन्तर्गत फागुन २९ गतेसम्म सुदूरपश्चिम प्रदेशका १ लाख ११ हजार २ सय ७७ जनाले  कोभिड–१९ विरुद्धको खोप लिएको सुदूरपश्चिम समाजिक विकास मन्त्रालयले जनाएको छ ।
दोस्रो चरणको खोप अभियान सञ्चालन भएपश्चात अछाम जिल्लाका १० हजार ५ सय १७, बैतडीमा १० हजार ८ सय ५४, बझाङमा १० ८ सय ७६, बाजुरामा ६ हजार १ सय २१, डडेल्धुरामा ७ हजार ६ सय ७८, दार्चुलामा ७ हजार ९८, डोटीमा १० हजार २ सय ४, कञ्चनपुरमा १८ हजार ५ सय ३१ र कैलालीमा २९ हजार ४ सय ७ जनाले कोभिड १९ विरुद्धको खोप लिएको मन्त्रालयले जनाएको छ । नेपाल सरकारले सञ्चालन गरेको पहिलो र दोस्रो चरणको कोभिड १९ विरुद्धको खोप अभियानमा सुदूरपश्चिम प्रदेशका १ लाख ४९ हजार ५ सय ७९ जनाले खोप लिएका छन् ।

अनलाइन डेस्क