समाचारहरू

गोरखा नपा–१० स्थित रत्नराज्यलक्ष्मी माध्यामिक विद्यालयका प्रध्यानाध्यापक सरला देवकोटालाई माघ ६ गते विद्यालय परिसरमै दुर्व्यवहार भएको पीडित पक्षको आरोप छ ।

विद्यालय व्यवस्थापन समितिले पुस ९ गते देवकोटालाई पदबाट हटाएर सोही विद्यालयका शिक्षक तेजबहादुर नेपालीलाई प्रध्यानाध्यापकमा नियुक्ति गर्ने निर्णय गरेको थियो  ।

विद्यालयमा नयाँ प्रध्यानाध्यापक नियुक्ति भइसक्दा पनि देवकोटाले पद खाली नगरेको भन्दै उनलाई अभिभावकले दुर्व्यवहार गर्दै जबरजस्ती कार्यकक्षबाट निकालेको देवकोटाले आरोप लगाएकी छन् ।

‘विद्यालय व्यवस्थापन समिति एकलौटी भयो भनेर नगरपालिकामा पनि उजुरी परेको  छ । उजुरी पर्दा पर्दै मलाई प्रधानाध्यापकको पदबाट हटाउने निर्णय गर्नुभयो ।’–देवकोटाले भनिन्–‘बिचमा पनि विद्यालय छाड भनेर धम्की आइराख्थ्यो । आज ८० देखि १ सय जनाको हाराहारीमा अभिभावक आएपछि, छलफल भयो । कार्यकक्षमा बसिरहेकी थिएँ तानेर जबर्जस्ती बाहिर निकाल्नुभयो ।’

भदौ २३ गते गठन भएको विद्यालय व्यवस्थापन समिति नेपाल कम्युनिष्ट पार्टी समर्थकहरूको एकलौटी भएको भन्दै अभिभावकहरूबाटै कात्तिक ३ गते नगरपालिका स्थित शिक्षा शाखामा उजुरी समेत परेको छ ।

विद्यालय व्यवस्थापन समितिका अध्यक्ष धनबहादुर आलेले भने समितिको निर्णय मान्न देवकोटाले अटेर गरेकाले घटना भएको बताए ।

‘विद्यालय व्यवस्थापन समितिको निर्णय कार्यान्वयन हुनुपर्छ भनेर हामी विद्यालय गएका थियौँ । छलफल  भयो । त्यस्तो अभद्र व्यवहार भएजस्तो मलाई लागेको छैन । शिक्षा शाखामा परेको उजुरी पनि यतिका समयसम्म टुङ्गिएको छैन ।’–उनले भने ।

गोरखा  नगरपालिकाका शिक्षा शाखा प्रमुख भरतकाजी अर्यालले विद्यालयमा भएको घटनाबारे मौखिक रूपमा जानकारी प्राप्त गरेको बताए ।

विद्यालय व्यवस्थापन समिति एकलौटी भयो भनेर परेको उजुरी छिनोफानो हुने प्रक्रियामा रहेको अर्यालको भनाइ छ ।

‘विद्यालय व्यवस्थापन समितिमाथि परेको उजुरीबारे हामी छानविन गर्दैछौँ । उजुरी प्रक्रियामै रहेकाले प्रधानाध्यापक फेर्ने निर्णय गर्नु चाहिँ सान्दर्भिक हुँदैन की भन्ने लाग्छ ।’– उनले भने ।

हरिराम उप्रेती