समाचारहरू

९० वर्षीया बृद्धालाई बलात्कार गरेको कसुरमा मोदी गाउँपालिका–१ भुकताङले घर भई हाल मोदी गाउँपालिका–३ देउरालीका २० वर्षीय शङ्कर परियारलाई जिल्ला अदालतले असार २४ गते ११ वर्ष कैद सजायको फैसलाका साथै ३० हजार रुपियाँ क्षतिपूर्ति भराउने फैसला गरेको छ ।

न्यायाधीश ध्रुबप्रसाद सापकोटाको इजलासले आरोपितलाई ११ वर्ष कैद सजाय र क्षतिपूर्ति भराउने फैसला गरेको स्रेस्तेदार दयाराम पोख्रेलले बताए ।

बोलाईसम्बन्धी अपाङ्गता समेत रहेकी पीडित बृद्धालाई आरोपितले गत वैशाख ५ गते मदिरा सेवन गरेर उनकै घरमा बलात्कार गरेको आरोप लागेको थियो ।

पीडितका आफन्तले थाहा पाएपछि जिल्ला प्रहरी कार्यालय पर्वतमा वैशाख ६ गते उजुरी दिएका थिए । प्रहरीले परियारलाई उजुरीका आधारमा गिरफ्तार गरी अनुसन्धान प्रक्रिया अघि बढाएको थियो ।

पीडित बृद्धाको स्वास्थ्य परीक्षण जिल्ला स्वास्थ्य कार्यालय पर्वतमा वैशाख ६ गते गरिएको थियो । पर्वत जिल्ला अदालतले जेठ १ गते परियारलाई पुर्पक्षका लागि थुनामा राख्ने आदेश दिएपछि असार २४ गते आइतबारका दिन ११ वर्ष कैदको सजाय र ३० हजार रुपियाँ क्षतिपूर्ति बापत जरिबाना भराउने आदेश गरेको हो ।

सन्तोष थापा