८० वर्षीया वृद्धालाई हत्या गरेको आरोपमा नाती गिरफ्तार

  ०७८ भदौ ३१ गते

दुर्गाथली गाउँपालिका– ५ की ८० वर्षीया वृद्धा रिठीदेवि जप्रेलको हत्या गरेको आरोपमा प्रहरीले २१ वर्षीय नाती शुभाष जप्रेललाई भदौ ३१ गते गिरफ्तार गरेको छ ।

८० वर्षीया जप्रेल भदौ २७ गतेदेखि हराएको भनेर पीडित पक्षले प्रहरीमा निवेदन दिएपछि खोजतलास गर्दै जाँदा भदौ ३१ गते पीडित पक्षकै आगनमा गाडिएको अवस्थामा वृद्धा महिलाको शव फेला परेको जिल्ला प्रहरी कार्यालयका डिएसपी रुपक खड्काले इन्सेक प्रतिनिधिलाई फोनबाट बताउनु भयो ।

घटनामा सङ्लग्न भएको आशंकामा दुर्गाथली गाउँपालिका–५ का वडाध्यक्ष समेत रहेका रामबहादुर जप्रेलका छोरा शुभाषलाई गिरफ्तार गरी अनुसन्धान भइरहेको डिएसपी खड्काले बताउनु भयो ।

मृतकका छोरा दुर्गाथली गाउँपालिका–५ का वडाध्यक्ष समेत रहेका रामबहादुर जप्रेलले घटना शंकास्पद रहेको भएपनि छोराले नै हत्या गरेको भन्ने विश्वास नलागेको इन्सेक प्रतिनिधिसँगको फोन सम्पर्कमा बताउनु भयो ।

शवको पोष्टमार्टमका लागि भदौ ३१ गते जिल्ला अस्पताल ल्याइएको छ ।


उत्तमकुमार थापा