समाचारहरू

मायादेवी गाउपालिका-४, पिपराका वडाअध्यक्ष फत्ते मोहम्मदका ६ वर्षीय छोरा मोहम्मद ऐहमानको फागुन ४ गते अपहरण भएकामा हाल सम्म अवस्था अज्ञात रहेको छ  ।

घर नजिकैको सुमाया गर्ल्स स्कुल गुल्डीहवामा नर्सरीमा पढ्ने बालकलाई स्कुल जाँदै गर्दा मोटर साइकलमा आएका दुई जना नचिनेका व्यक्तिले बालकलाई चकलेट अपहरण गरेको वडाअध्यक्ष मोहम्मदले बताएका छन ।

आफू वडाध्यक्ष भएपछि अज्ञात व्यक्तिले वडाका विभिन्न योजनाका लागि छुट्याइएको १ करोड ७४ लाख रकम आफूलाई दिन धम्की दिएको उनले बताए ।

अपहरण भएको मौखिक जानकारी जिल्ला प्रहरी कार्यालय कपिलवस्तुमा दिएपछि अपहरणबारे प्रहरीले खोजी कार्य सुरू गरी अनुसन्धान गरिरहेको जनाएको छ । अपहरित बालकका परिवारले आफ्नो बच्चालाई यथाशीघ्र अपहरणमुक्त गरिदिन मानव अधिकारकर्मी, पत्रकार तथा नागरिक समाजलाई आग्रह गरेको छ ।

वडाध्यक्षको छोराको अपहरण भएपछि मायादेवी गाउँपालिकामा बसेको आकस्मिक बैठकले अपहरित बालकको मुक्ति, दोषीलाई कारवाही गर्न सम्बन्धित निकायलाई दबाव दिने निर्णय गरेको छ ।

गाउँपालिकाका अध्यक्ष बजरङ्गी प्रसाद कुर्मीले बालक अपहरण भएको ४८ घण्टा भित्रै अपहरणकारीले शकुसल बालकलाई मुक्त नगरे/नगराए प्रशासन कार्यालय घेराउ गर्ने तथा जिल्लाका सम्पुर्ण जनप्रतिनिधिहरू आन्दोलित हुँदै जिल्ला बन्द गर्ने निर्णय भएको बताएका छन् ।

नन्दराम पौडेल