समाचारहरू

गोरखा कारागारमा गत वैशाखदेखि अहेबको दरबन्दी रिक्त हुँदा कैदीबन्दीको उपचारमा समस्या भएको छ ।

स्वास्थ्यकर्मी नहुँदा दीर्घरोगी र आकस्मिक उपचारमा समेत समस्या झेल्नुपरेको कैदीबन्दीको गुनासो छ ।

३५ जना क्षमता रहेको गोरखा कारागाराको पुरुष कक्षमा ९२ जना कैदीबन्दी छन् । महिला कक्षमा आठ जना कैदिबन्दी छन् ।

‘म मधुमेहको रोगी छु । बाहिर हुँदा हरेक महिना परीक्षण गर्थेँ ।’–शिवकुमार शाहले भन्नु भयो–‘अहिले परीक्षण गर्छु भन्दा स्वास्थ्यकर्मी छैनन् । कारगारभित्र प्राथमिक उपचार सेवाबाट समेत वञ्चित हुनुपरेको छ ।’

कारागार भित्र पाँच जना मुटुरोगी रहेको कारागारका जेलर गणेश भट्टराईले बताउनु भयो । दुई जना ८० वर्ष नाघेका ज्येष्ठ नागरिकलाई नियमित स्वास्थ्य चेकजाँच हुन नसकेको उहाँले बताउनु भयो ।

कारागारमा कार्यरत अहेब वैशाखमा सरुवा भएपछि दरबन्दी पदपुर्ति नहुँदा समस्या थपिएको जेलर भट्टराईले बताउनु भयो ।

प्रदेश सरकारसँग स्वास्यकर्मी पदपुर्तिका लागि माग गरेको भएपनि सो हुन नसकेको उहाँको भनाइ छ ।

आकस्मिक रुपमा बिरामी परेका कैदिबन्दीलाई गोरखा अस्पतालमा लगेर उपचार गर्ने गरेको जेलर भट्टराईले बताउनुभयो ।

कात्तिक २४ गते कारागार निरीक्षणमा पुग्नु भएका गण्डकी प्रदेशका मुख्य न्यायाधिवक्ता रोशन बास्तोलासमक्ष पनि कैदीबन्दीले स्वास्थ्यकर्मी उपलब्ध गराउन माग राखे ।

हरिराम उप्रेती