समाचारहरू

कुमाख गाउँपालिका-७ स्यानीजिमालीमा रहेको जनता आधारभुत विद्यालयमा विगत ६ महिनादेखि विद्यार्थीहरू खुल्ला चौरमा पढ्न बाध्य भएका छन् ।

गत साउनमा विद्यालयको चारकोठे भवन भत्किएपछि ६ महिनादेखि विद्यार्थीहरू खुल्ला चौरमा बसेर पढ्न बाध्य भएको विद्यार्थी विजय थापाले बताए ।

 

आफ्ना विद्यालयका विद्यार्थीलाई भवन भत्किएपछि विगत ६ महिनादेखि खुल्ला चौरमा बसेर पढाउनु परेको विद्यालयले जनाएको छ । 'भत्किएको भवन मर्मतका लागि जिल्ला शिक्षा कार्यालय हुँदै विभिन्न सरोकारवालासँग अनुरोध गर्‍यौँ ।' विद्यालयका प्रधानाध्यापक जनकराज डिसिले भने-­'तर कहिँ कतैबाट पनि सहयोग प्राप्त भएन ।'

 

भवन नहुँदा विद्यार्थीहरूले निकै सास्ती झेल्नुपरेको प्रअ डिसिले बताए । 'पानी परेको बेलामा २/३ ओटा कक्षा एकै ठाउँमा राखेर पढाउछौँ ।'- ­प्रधानाध्यापक डिसिले थपे-­'कि त विद्यालय नै बन्द गर्नुपर्‍यो ।'

हाल विद्यालयमा बाल विकासदेखि कक्षा ६ सम्म ९९ जना विद्यार्थी अध्यनरत छन् । माथिल्लो कक्षा पर्ढाई हुने अर्को विद्यालय टाढा भएकाले विद्यालयले आगामी शैक्षिक वर्षदेखि कक्षा ७ समेत सञ्चालन गर्ने योजनामा विद्यालय रहेको छ । बाल विकासदेखि कक्षा ६ सम्म सञ्चालन भएको विद्यालयमा चारओटा कक्षाकोठाको अभाव रहेको छ ।

 

कहिँकतैबाट भवन मर्मतका लागि सहयोग आएमा आफूहरूले आवश्यकता अनुसार श्रमदान गर्न तयार रहेको विद्यालय व्यवस्थापन समितिका सदस्य अकवर बोहराले बताए । बोहराले भने-'कसैले विद्यालयको मर्मतका लागि सहयोग गरेको खण्डमा हामीले गर्न सक्ने सबै काम श्रमदानबाटै गर्न सक्छौँ ।'

 

विद्यालयले हाल सिकाइ उपलव्धि सुधारका लागि कक्षा १ र २ मा इजिआर विधिबाट पठनपाठन गरिरहेको छ भने बाल विकास केन्द्रमा ६ सिकाइ कुना बनाएर प्रारम्भिक साक्षरता र गणितीय सिपको ज्ञान सिकाइ रहेको छ ।

 

भवन नहुँदा पर्याप्त मात्रामा शैक्षिक सामग्री प्रयोग गरेर सिकाउन नसकिएको प्रअ डिसिले बताए । 'बाहिर पढाउँदा विद्यार्थीको ध्यान विकेन्द्रित हुने भएकोले समस्या परेको छ ।'-प्रअ ­डिसिले भने ।

मिना बुढाथोकी