समाचारहरू

जिल्लाकाे सिंजा गाउँपालिकामा ४९ जना बालबालिकामा कुपोषण देखिएको छ । ७ सय २० बालबालिकाको पोषण लेखाजोखा (परीक्षण) गर्दा ४९ जना बालबालिकामा कुपोषण देखिएको हो । ७ जनालाई अति सिघ्र कुपोषण र ४२ जनालाई मध्यम सिघ्र कुपोषण देखिएको हो ।

पोषणमैत्री स्थानीय शासन प्रवर्धन गर्नुका साथै पोषण अवस्था सुधार गर्न पाँच दिनसम्मको समयवधिमा हरेक गाउँबस्ती टोलका घरघरमा पुगेर बालबालिकाको पोषण लेखाजोखा गरिएको हो ।

सबै बालबालिका स्वास्थ्य संस्था टाढा भएर पुग्न नसक्ने, कुनै पनि बालबालिका नछुटुन भन्ने उदेश्यले  टोल स्तरमा पोषण लेखाजोखा अभियान सञ्चालन गरिएको हो ।

पहिचान पश्चात अति सिघ्र कुपोषित बच्चालाई उच्च स्वास्थ्य केन्द्रमा रिफर गरिएको र मध्यम सिघ्र कुपोषितलाइ परामर्श गर्ने गरिएको छ । यस कार्यक्रमलाई अझै प्रभावकारी तरिकाले अगाडि बढाउन तथा बालबालिकाको पोषणमा सुधार ल्याउनका लागि पोषणमैत्री स्थानीय शासनलाई सिंजा गाउँपालिकामा मुख्य सहयोगीको रुपमा भूमिका निर्वाह गर्दै आइरहेको छ ।

नेपाल सरकारको विभिन्न पोषण योजना लागु भइरहेको अवस्थामा पनि  बालबालिकाको पोषण अवस्था सुधार हुन सकेको छैन । बच्चाको जन्मिदा कम तौल, विपन्न परिवार, सन्तुलित आहारको अभाव, स्थानीय खानाको बेवस्ता, किशोर अवस्थामा गर्भवती जस्ता कारण देखाएका छन् । यी कारणलाई सम्बोधन गर्न स्थानीय सरकार, सरोकारवाला संघसंथा, अभिवावक, आमा समूह र बालबालिका  सक्रिय रहेको सिंजा गाउँपालिका स्वास्थ्य शाखा प्रमुख ललित रोकायाले बताउनु भयो । .

मानदत्त रावल