समाचारहरू

खानीगाउँ गाविस ढिकुरेमा स्थानीय निकाय पुनर्संरचनाको सीमाङ्कनको विरोधमा आन्दोलनरत स्थानीय र प्रहरीबिच माघ १२ गते झडप हुँदा ६ जना आन्दोलनकारी घाइते भएका छन् ।

सीमाङ्कनको विरोधमा स्थानीयले बन्द गरेको ढिकुरेमा नेपाली काङ्ग्रेसका केन्द्रीय सदस्य तथा पूर्वमन्त्री डा. रामशरण महत बन्द गर्न नहुने भन्दै जागरण सभा गर्न गएका थिए । उक्त कार्यक्रम आन्दोलनकारीले विथोल्ने प्रयास गर्दा प्रहरीले बल प्रयोग गरी ४७ राउण्ड रबरको गोली र २३ सेल अश्रुग्यास प्रहार गरेको जिल्ला प्रहरी कार्यालयका डिएसपी ऋषिराम कँडेलले बताए ।

उक्त घटनामा रबरको गोलीबाट सुर्यमति-२ का २२ वर्षीय सुजन न्यौपाने, सोही वडाका ५५ वर्षीय  लक्ष्मण गुणी, सुर्यमति-१ का २७ वर्षीय कान्छा भण्डारी घाइते भएको आन्दोलनको नेतृत्व गर्नेहरूमध्ये एक थानसिङ गाविसका नेपाली काङ्ग्रेसका सभापति विनोद पाठकले जानकारी दिए । यस्तै लाठीचार्जमा परी थानसिङ-७ का ३५ वर्षीय नवराज रोक्का, सुर्यमति-१ का ४० वर्षीय  कृष्ण गजुरेल र सुर्यमति-२ का २६ वर्षीय विकास मगर घाइते भएका छन् । घाइतेहरूको खानीगाउँ मेडिकलमा उपचार गरिएको छ ।

कार्यक्रममा डा. महतले प्रहरीको घेरामा कोणसभा गरी बन्द गरेर स्थानीयलाई दुख दिन नहुने भन्दै पुनर्संरचना आयोगले सरकारलाई बुझाए अनुसार नै सीमाङ्कन हुनु पर्ने बताए । उनले संयम भएर विकास निर्माणका कार्यमा सहभागी हुन आग्रह गर्दै स्थानीय निकाय पुनर्संरचना गर्दा स्थानीयबासीकै भावना अनुसार आयोगलाई आफूले सुझाव दिएको बताए ।

१ सय जना भन्दा बढी सुरक्षाकर्मीको साथ पुगेका डा. महतविरुद्ध चर्को नारावाजी भएको थियो । स्थानीय निकाय पुनर्संरचनाको लागि जिल्ला प्राविधिक समितिले सिफारिस गरेको लिखु गाउँपालिका बदर गरिएपछि माघ २ गतेबाट नुवाकोटको खानीगाउँ, थानसिङ, सुर्यमति र चौघडा गाविस बन्द गरी स्थानीयबासी आन्दोलनमा उत्रिएका छन् । माघ ७ गते यी चार गाविसका आन्दोलनकारीले विदुरमा जिल्ला विकास समितिको कार्यालयमा तोडफोडसमेत गरेका थिए ।

जिल्लाको पूर्वी भेगलाई जोड्ने यही गाविस हुँदै सडक गएकोले ११ दिनदेखि बन्द हुँदा २० ओटा गाविसका बासिन्दा प्रभावित भएका छन् ।

नवदीप श्रेष्ठ