समाचारहरू

तनहुँका करिव ३५ प्रतिशत नागरिकमा खाद्य असुरक्षा रहेको छ । विश्व खाद्य दिवसको अवसरमा ०७३ कात्तिक ११ गते दमौलीमा आयोजित कार्यक्रममा जिल्ला कृषि विकास कार्यालयले जनाए अनुसार करिब ६५ प्रतिशत घरधुरीमा ४ महिना भन्दा बढी समयको लागि मात्र खाद्यान्न सञ्चिती रहेको देखिएको छ ।

कार्यालयका अनुसार तनहुँका ८० प्रतिशत घरधुरी खाद्य उपभोगको न्यूनतम आवश्यकता पुरा गर्न सक्षम रहेका छन् । तनहुँका नागरिकले धान, मकै, गहुँ, कोदो, माछा, सुन्तला, अदुवा र मासुजन्य वस्तु खाद्यान्नको रूपमा उपभोग गर्ने गरेका छन् ।

गत आर्थिक वर्षमा भएको नाकाबन्दीले समयमै रासयानिक मल नपाएका कारण कृषि बाली उत्पादनमा कमी आएको कार्यालयका प्रमुख चेतनाथ अधिकारीले बताए । तनहुँ धान, मकै र सुन्तलामा आत्मनिर्भर रहेको पनि कार्यालयले जनाएको छ ।

यसैबिच विश्व खाद्य दिवस कात्तिक ११ गते दमौलीमा विभिन्न कार्यक्रमको आयोजना गरी मनाइएको छ । 'भइरहेछ जलवायु परिवर्तन, गर्नुछ खाद्य र कृषिमा अनुकूलन' भन्ने नाराका साथ यो दिवस मनाइएको हो ।

विश्व खाद्य दिवस प्रत्येक वर्ष अक्टुबर १६ मा मनाइने गरेको भएपनि यस वर्ष उक्त दिन असोज ३० गते दसैँ पर्व परेका कारण यो दिवस अहिले मनाइएको कृषि विकास कार्यालयले जनाएको छ ।

प्रकाशचन्द्र भट्टराई