समाचारहरू

झिमरुक गाउँपालिका-१, सौतामारे गाउँका २ सय १० घरधुरी परिवारमा खानेपानीको समस्या भएको छ । सौतामारे गाउँमा लामो समयदेखि खानेपानीको सुविधा नहुँदा घण्टौँ लगाएर पानी बोक्नुपर्ने बाध्यता रहेको छ ।

साबिकको बाङ्गेमरोठ गाविसको सौतामारे बस्तीमा सरकारले खानेपानीको व्यवस्था नर्गदा उक्त समस्या भएको हो । धेरै वर्ष पहिला केही घरधुरीमा काप्रा खोलाको पानी पाइपद्वारा लगेकोमा सो खानेपानीको पाइप जीर्ण पुरानो भइ मर्मत नहुँदा पानी आउन छाडेको स्थानीय ५५ वर्षीय हिमलाल रोका क्षत्रीले बताउनु भयो ।

बस्तीभन्दा तल रहेको काप्राखोलामा बगेको पानी घण्टौँ लगाएर गाग्रीमा बोकी प्रयोग गर्दै आएको गाउँमा खानेपानीको व्यवस्था गर्न जनप्रतिनिधिहरू, स्थानीय तथा प्रदेश सरकारलाई बारम्बार निवेदन दिए पनि बस्तीमा खानेपानीको व्यवस्था अहिलेसम्म नभएको स्थानीय ५२ वर्षीया बिना रानाले गुनासो गर्नुभयो । खोलामा बगेको पानी खाने गरेको र वर्षाको समयमा धमिलो हुनाले खान नहुने उहाँले उल्लेख गर्नुभयो । अन्य समयमा गाई बस्तुले फोहोर गर्ने गर्मीको समयमा सुख्खा रहने हुँदा सारै दुख भएको स्थानीय रानाले बताउनु भयो । सिङ्गो बस्तीका करिव ५ सय ६० घर धुरीलाई समेट्ने गरी ०७८ सालमा लुम्बिनी प्रदेशबाट तामाखोली लिफ्ट खानेपानी आयोजना झिमरुक गाउँपालिका-१, सौतामारे आयोजना सुरु भए पनि प्रयाप्त बजेट नआउँदा सो योजना अलपत्र भइ पुरै गाउँमा खानेपानीको समस्या रहेको झिमरुक गाउँपालिका-१ का स्थानीय ४३ वर्षीय रामबहादुर महतराले बताउनु भयो ।

खानेपानीको सुविधा नहुँदा प्रत्यक वर्ष वर्षातको समयमा पानी परी खोलो धमिलो हुने र खोलामा फोहार पानी बग्ने हुँदा आफूहरूले दुषित पानी पिउन बाध्य भएको र बस्तीमा पानीको व्यवस्था नहुँदा सरसफाई गर्न, बस्तु भाउलाई खुवाउन समस्या भएको महतराले बताउनु भयो । दुषित पानी पिउँदा रुघाखोकी, ज्वरो र पखला जस्ता रोगहरूले यस बस्तीका नागरिकहरूलाई सताई रहेको स्थानीय ६० वर्षीय बीजुला जिसीले बताउनु भयो ।

यस बस्तीमा खानेपानीको समस्या धेरै पहिलेदेखि रहेको झिमरुक गाउँपालिका-१ का वडा अध्यक्ष धुब्र खनालले बताउनु भयो । बस्ती ठूलो हुँदा सानासाना पानीका श्रोतले पनि प्रयाप्त नहुने हुँदा सबै घर धुरीलाई समेट्ने गरी तामाखोली लिफ्ट खानेपानी आयोजना झिमरुक गाउँपालिका-१, सौतामारे आयोजना सुरु गरेको र प्रदेश सरकाले प्रयात बजेट निकाशा नगर्दा योजना अलपत्र हुँदा नागरिकहरूको पानी खाने सपना पुरा नभएको वडा अध्यक्ष खनालको भनाइ छ ।

सो योजनाको अधुरो कामको अनुगमन गरी सम्बधित ठाउँमा योजनाको कार्य सम्पन्न गर्नको लागि आवश्यक बजेट विनियोजन सिफारिस गर्न प्यूठान जिल्लाका प्रतिनिधिसभा सांसद सुर्यबहादुर थापा र प्रमुख जिल्ला अधिकारी रमा सुवेदी आचार्यले ०८१ कातिक २६ गते आयोजना स्थल अनुगमन गरेको वडा अध्यक्ष खनालले बताउनु भयो ।

रविन्द्र पाण्डे