समाचारहरू

मध्यपुर थिमी नगरपालिका–२ मा रहेको बाल सुधार गृहमा ९६ जना पुरुष र १९ जना महिला गरी १ सय १९ जना १८ वर्षमाथिका वयष्क राखिएको पाइएको छ ।

समयमा नै मुद्दा फर्स्यौट नहुने, उमेरमा देखिएका विवाद, उमेर पुगेकै मितिबाट कारागारमा चलान गर्ने स्पष्ट कानुनी व्यवस्था नहुनुलगायतका कारणबाट बाल सुधार गृहमा बालबालिका मात्रै नरहेको पाइएको हो ।

सुविधा विहिन बालबालिकाका लागि शैक्षिक कार्यक्रम (युसेप)को व्यवस्थापनमा सञ्चालित बाल सुधार गृहका सामाजिक कार्यकर्ता प्रवीण शिल्पकारले बाल सुधार गृहमा हाल २ सय ८ जना पुरुष र ३८ जना महिला रहेका बताउनु भयो ।

उहाँका अनुसार १ सय जना बालकको क्षमता रहेको बाल सुधार गृहमा १८ वर्षमुनिका बालक १ सय १४ जना र १८ वर्ष माथिका पुरुष ९६ जना छन् । त्यसैगरी १० जना बालिकाको क्षमता रहेको यो सुधार गृहमा १८ वर्षमुनिका १९ जना बालिका र १८ वर्षमाथिका १९ जना महिला रहेका छन् ।

पढ्ने उमेरका र पढ्न चाहने बालबालिकाका लागि कक्षा ५ देखि १० सम्म सुधार गृहभित्र नै पठनपाठनको व्यवस्था रहेको सामाजिक कार्यकर्ता शिल्पकारले बताउनु भयो ।

मध्यपुर थिमी नगरपालिका–२ मा कारागार व्यवस्थापन विभाग मातहत रहेको न्युनतम सुविधा विहिन बालबालिकाका लागी शैक्षिक कार्यक्रम (युसेप) नेपालले सानोथिमीमा ०५८ सालदेखि बाल सुधार गृह सञ्चालन गर्दै आएको छ ।

युसेपका बाल अधिकार संयोजक सङ्गम चालिसेले बाल अधिकारको बृहत्तर हितमा काम गर्दै आएको बताउँदै सुधार गृहमा देखिएका समस्या समाधानमा लागि परेको बताउनु भयो ।

बाल सुधार गृहको कम्पाउण्ड पर्खाल निकै कमजोर रहेका कारणा बालबािलका जोखिममा रहेका हुँदा सोको व्यवस्थापन चुनौतिपूर्ण रहेको उहाँको भनाइ छ ।

यहाँको बाल सुधार गृहमा ०८० भदौ ३ गते एक जनाको मृत्यु भएको र बालबालिका सुधार गृहबाट बाहिरिएको घटना सार्वजनिक भएको थियो ।

इन्सेकको नेतृत्वमा विभिन्न सङ्घसंस्थाका प्रतिनिधि सम्मिलित स्थलगत अध्ययन टोलीले ०८० भदौ १५ गते जारी गरेको प्रतिवेदनमा बाल सुधार गृहको सञ्चालन गर्ने संस्था युसेपको लापरवाही र प्रशासनको उदासिनताका कारण भएको जनाइएको छ ।

जमुना भट्टराई