समाचारहरू

जिल्लाका स्थानीय तह स्तरमा निर्माण भएका १५ शैयाका अस्पताल अलपत्र अवस्थामा रहेका छन् । निर्माण कार्य सम्पन्न भएको दुई वर्ष बित्दा पनि अस्पताल सञ्चालन विहिन अवस्था देख्दा स्थानीयहरू निरास हुँदै गएका छन् ।

भूमिकास्थान नगरपालिका-७, नुवाकोट चिदिचौरमा पालिकास्तरीय १५ शैयाको अस्पतालको भवन निर्माण कार्य २०७९ असारमा सम्पन्न भएको थियो । अस्पताल बन्ने कुरा सुन्दा, निर्माण कार्य शुरु हुँदा र भवन बनेर सम्पन्न हुँदा स्थानीयहरु निकै खुसी भएका थिए । अहिले स्थानीयबासीहरू निरास भएर अबको तीन वर्षपछि यो संरचना के कस्तो हुने हो भन्ने चिन्ता व्यक्त गर्न थालेका छन् । आफूहरू टाउको दुःखेको सिटामोल र पखाला लागेको जीवनजल लिन दुई घण्टा हिँडेर स्वास्थ्य चौकी जानुपर्ने स्थानीय पार्बता विकले बताउनु भयो ।

'गाउँमै अस्पताल बन्यो । हामी निकै खुसी भयौँ । डाक्टर आउलान् औषधी उपचार पाइएला भनेको त अस्पतालमा झारपात र झाडीले ढाक्दै गयो । के कारणले सञ्चालन हुन सकेन हामीलाई थाहा भएन । सामान्य रुघा, खोकी जचाउन सन्धिखर्क जिल्ला अस्पतालमा ४ सय रुपियाँ भाडा तिरेर जानुपर्छ । हामी जस्ता गरिब महिलाले औषधी उपचार नपाएर मर्नु शिवाय केही रहेनछ' - स्थानीय ६८ वर्षीय सुमित्रा विकले बताउनु भयो ।

भूमिकास्थान नगरपालिका-७ का वडाध्यक्ष रामचन्द्र ढुङ्गनाले आफ्नै वडामा अस्पतालका लागि यस्तो राम्रो र व्यवस्थित भवन बनेपनि आर्थिक स्रोत अभावका कारण सञ्चालनमा ल्याउन नसकेको बताउनु भयो । पालिका अस्पताल सञ्चालनमा नआउनुको मुख्य कारण आर्थिक स्रोत र डाक्टरको अभाव हो । तीनै तहका सरकारको पहलमा छिटै सञ्चालनमा आउला भन्ने विश्वास भएपनि हालसम्म सञ्चालनमा नआएको भूमिकास्थान नगरपालिका स्वास्थ्य शाखा प्रमुख शुरेस गैरेले बताउनु भयो ।

अर्घाखाँची अस्पतालका मेडिकल सुपरिटेन्डेन्ट डा. जगनाथ तिवारीले जिल्ला अस्पतालको अवस्था पीडादायिक भएको बताउनु भयो । अस्पतालमा दरबन्दी अनुसार विशेषज्ञ डाक्टर छैनन् । स्वास्थ्य सेवा प्रवाहका लागि अस्पतालको भवन पुरानो भएको हुँदा समस्या बुझ्ने कोही पनि नभएको उहाँको भनाइ छ । भूमिकास्थान नगरपालिका-७, चिदिचौरको पालिका अस्पतालको भवन ०७९ सालको असोज महिनामा स्थानीय सरकारमा हस्तान्तरण भए पनि अहिलेसम्म सञ्चालनमा आउन नसकेको उहाँको भनाइ छ ।

निबर्तमान नगर प्रमुख रेशम थापाका अनुसार भुमिकास्थान नगरपालिकाका १० ओटा वडामा सात ओटा स्वास्थ्य चौकी, तीन ओटा आधारभूत स्वास्थ्य सेवा केन्द्र, तीन ओटा उपस्वास्थ्य सेवा केन्द्र र चार ओटा बर्थिङ्ग सेन्टर छन् । नगरपालिकाका १२ ओटा माध्यमिक विद्यालयमा एक/एक जना स्टाफ नर्स छन् । सरकारको नीति कार्यक्रम अनुसार पालिकामा अस्पतालको भवन निर्माण कार्य बिना समस्या सम्पन्न भएको उहाँले उल्लेख गर्नुभयो ।

भूमिकास्थान नगरपालिका नगरप्रमुख झबिलाल थापाले सङ्घीय सरकारको १२ करोडको लगानीमा बनेको सुविधा सम्पन्न अस्पताल सहजै स्थानीय सरकारलाई हस्तान्तरण भएको बताउनु भयो । यस्तो अस्पताल चलाउने स्थानीय आर्थिक स्रोत आफूहरूसँग नभएको उहाँले बताउनु भयो । केन्द्र र प्रदेश सरकारले आर्थिक र प्राविधिक सहयोग गरिदिए अस्पताल सञ्चालनमा सहज हुने उहाँको भनाइ छ ।

कुलबहादुर नेपाली