१३ वर्षीया बालिकाको हत्या, बलात्कार पछि हत्या भएको आशङ्का

 

लौहकी गाविस-२ की १३ वर्षीया राधाकुमारी यादवको मङ्सिर २१ गते बलात्कारपछि हत्या भएको आशङ्का गरिए पनि हत्याको कारण र आरोपितबारे पत्ता लागेको छैन ।

पीडित बालिका २१ गते सबेरै नरसिंह गाविस-८ स्थित आफ्नै धानबारीमा धान काटन गएकोमा बिहान नौ बजे स्थानीयले उनको शव फेला परेपछि प्रहरीलाई खबर गरेका थिए ।

खबर पाउनसाथ जिल्ला प्रहरी कार्यालय सुनसरीको टोलीले अनुसन्धान सुरु गरेको इन्स्पेक्टर नवराज न्यौपानेले बताए । बालिकाको शवको पोष्टमार्टम सोही दिन विपी कोइराला स्वास्थ्य विज्ञान प्रतिष्ठान धरानमा गरिएको छ ।

पोष्टमार्टम रिर्पोट नआएकाले हत्याको कारण नखुलेको भन्दै इन्स्पेक्टर नवराज न्यौपानेले पोष्टमार्टम रिर्पोट आएपछि हत्याको कारण पत्ता लाग्ने बताए । घटनाबारे क्षेत्रीय प्रहरी कार्यालय विराटनगर र जिल्ला प्रहरी कार्यालय सुनसरीको संयुक्त टोलीले अनुसन्धान गरिरहेको इन्स्पेक्टर न्यौपानेले जानकारी दिए ।

हत्याराबारे पनि अनुसन्धान भइरहेको उनको भनाइ छ । बालिकाको सामूहिक बलात्कारपछि हत्या भएको हुनसक्ने स्थानीयले आशङ्का व्यक्त गरेका छन् ।


शेखर ढकाल