समाचारहरू

ऐरावती गाउँपालिका–४ तिग्रापालका पहिरो पीडित २५ घर परिवारले अझैसम्म पनि पुनर्वास पाएका छैनन् । ०७९ असोज १९ गते परेको अविरल वर्षातका कारण ऐरावती गाउँपालिका–४ तिग्रापालमा गाउँ माथिबाट जमीन धाँजा फाटी सो ठाउँमा बसोबास गर्ने चुमबहादुर बिक, टुकबहादुर बिक, तेजबहादुर बिक, चेतबहादुर बुढामगर, दुर्गा आलेमगर लगायत २५ घरपरिवारका करिव १ सय १९ जना विस्थापित भएका थिए ।

पहिरोको कारण घरमा बस्न जोखिम भएपछि गाउँ नजिकैको पद्मोदय प्राविमा दुई महिना बसोबास गरी गाउँदेखि माथि जग्गा भएकाहरू आफ्नो जग्गामा गाउँपालिकाले दिएको त्रिपाल तथा अन्य आफन्तहरूको घरमा बस्दै आएको र हालसम्म पुनर्वासको लागि कहिँकतैबाट सहयोग नआएको ४५ वर्षीया विस्थापित सुकमाया बुढामगरले गुनासो गर्नुभयो ।

गाँउपालिका, वडा कार्यालयहरूमा पुनर्वासका लागि निवेदन तथा छलफल भए पनि प्रदेश सरकारबाट पुनः निर्माणको काम हुने गाउँपालिकाले जनाउँदै आएको छ । अर्काको घरमा बसी कष्टकर जीवन बिताउनुपरेको विस्थापित सीता आलेले बताउनु भयो । पहिरोबाट विस्थापित भएको ११ महिना बित्दा समेत राज्यको कुनै पनि निकायबाट पुनर्वास लगायतको सहयोग नपाउनाले दुःखी भएको विस्थापित टुकबहादुर बिकले बताउनु भयो ।

पुनर्वासका लागि गाउँपालिकाले लुम्बिनी प्रदेश सरकारसँग प्रक्रिया अघि बढाएकाले ढिलोचाँडो पहिरो पीडित परिवारलाई पुनर्वासको व्यवस्था हुने ऐरावती गाउँपालिका-४ का वडा अध्यक्ष शङ्करबहादुर भण्डारीले बताउनु भयो । पहिरो पीडितलाई पुनर्वासको बारेमा सङ्घ र प्रदेशमा पटकपटक जानकारी पठाएको र अन्य ठाँउका पीडितलाई रकम आएपनि यो वडामा नआएको जिल्ला प्रशासन कार्यालयका प्रशासकीय अधिकृत मेघराज सोनीले बताउनु भयो ।

रविन्द्र पाण्डे