समाचारहरू

पुर्नवास-८ आनन्दबजार नजिक भारतीय सिमा सुरक्षा वलले चलाएको गोली लागेर मृत्यु भएका गोविन्द गौतमको फागुन २९ गते दोदा नदीमा ११ तोपको सलामीसहित अन्तिम संस्कार गरिएको छ ।

हिन्दु परम्परा अनुसार गरिएको गौतमको अन्तिम संस्कारमा नेपाल प्रहरीले ११ तोपको सलामी दिएको थियो । सेती अञ्चल अस्पताल धनगढीबाट सुरु भएको शव यात्रा दोदा नदीमा पुगेपछि उनका बावुले हिन्दु परम्परा अनुसार दागवत्ती दिएर अन्तिम संस्कार गरिएको थियो ।

नेपाली भूमि रक्षाका लागि ज्यान गुमाएको भन्दै गौतमलाई नेपाल सरकारले शहीद घोषणा, राहत स्वरुप गौतम परिवारलाई नगद १० लाख रुपियाँ र गौतमका तीन जना छोरीलाई उच्च शिक्षासम्म निशुल्क अध्ययन गराउने निर्णय गरेको प्रमुख जिल्ला अधिकारी मनोहरप्रसाद खनालले बताए ।

जिल्ला सुरक्षा समिति कञ्चनपुरले सुरक्षालाई मध्यनजर गर्दै पुर्नवास नगरपालिका-८ आनन्द बजारमा फागुन २८ गतेबाट निषेधाज्ञा जारी गरेको छ । दुई पक्षबिच झडपको स्थिति सिर्जना हुन नदिन नेपाल र भारत दुवैतर्फठूलो सङ्ख्यामा सुरक्षाकर्मी परिचालन गरिएको जिल्ला प्रहरी कार्यालय, कञ्चनपुरले जनाएको छ ।

कोमलनिरन्जन भाट