समाचारहरू

फकिरा गाविस-५ घर भई राजविराज नपा-५ स्थित दाजु विनोद साहको घरमा बसेर अध्ययन गरिरहेका १० वर्षीय प्रमोदकुमार साहको हत्या गरेको कसुरमा २२ वर्षीया भाउजू सञ्जिलादेवी यादव साहलाई जिल्ला अदालतले पुस ५ गते सर्वस्वसहित जन्मकैद सजायको फैसला गरेको छ ।

न्यायाधीश शङ्करबहादुर राईको इजलाशले आरोपितलाई कसुरदार ठहर गर्दै जन्मकैद सजायको फैसला सुनाएको अदालतका स्रेस्तेदार नरेन्द्र श्रेष्ठले जानकारी दिएका छन् ।

पीडित बालकलाई आरोपितले कुटपिट गरी गत वैशाख २७ गते राति हत्या गरेर घरदेखि ६ सय मिटर दक्षिण राजविराज नपा-६ स्थित ढल नालाको पुलचोक कल्भर्टमा लाश फालेको आरोप थियो । घाँटीमा चोट पटकको दाग भएको अवस्थामा वैशाख २८ गते पीडितको लाश फेला परेपछि अनुसन्धानका क्रममा प्रहरीले सञ्जिलालाई वैशाख २९ गते गिरफ्तार गरी कर्तव्य ज्यान मुद्दा दर्ता गरेको थियो । लाशको पोष्टमार्टम राजविराजस्थित गनासिं सगरमाथा अञ्चल अस्पतालमा वैशाख २८ गते गरिएको थियो ।

मृतकका ४० वर्षीय बुवा उमेशकुमार साहले आरोपितमाथि शङ्का गर्दै वैशाख २८ गते जिल्ला प्रहरी कार्यालयमा उजुरी दिएका थिए ।

जिल्ला अदालतको आदेशले आरोपित पुर्पक्षका लागि जेठ २४ गतेदेखि राजविराज कारागारमा थुनामा रहेकी थिइन् ।

मनोहरकुमार पोखरेल