समाचारहरू

बेलुकी अबेरसम्म पढेर सुतेका उग्रतारा जनागाल गाविस-८ का १७ वर्षीय प्रमोद भनिने कृष्णराम पुर्कोटी बनेपा नपा-५ मा रहेको ज्ञानकुञ्ज माविको होस्टेलमा फागुन ९ गते बिहान मृत भेटिएपछि आक्रोशित जमातले विद्यालय तोडफोड गरेको छ ।

ज्ञानकुञ्ज माविमा नर्सरीदेखी पढ्दै आएका पुर्कोटी एसएलसी परीक्षाको तयारीका लागि एक महिना अगाडिबाट विद्यालयको होस्टेलमा राखिएका थिए ।

फागुन ९ गते विहान सँगै सुतेका साथीहरूले बोलाउँदा नबोलेका कारण वार्डेन र कोठामा रहेका साथीहरूले बोकेर नजिकैको करुणा अस्पताल पुर्‍याएका थिए । करुणा अस्पतालले मृत्यु भइसकेको थाहा पाएपछि 'आफूहरूले नसक्ने' भन्दै शीर मेमोरियल अस्पताल जान सल्लाह दिएका थिए । शीर मेमोरियल अस्पतालमा पुर्‍याएपछि उनलाई मृत घोषणा गरिएको थियो ।

मृतकका आफन्तहरूले पुर्कोटीलाई विद्यालय प्रशासन र सँगै बसेका साथीहरूको मिलेमतोमा मारिएको भन्दै दिँउसो विद्यालय तोडफोड गरेका थिए । विद्यालय तोडफोडबाट जोगाउन प्रहरीले सात राउण्ड हवाइ फायर गरेको थियो । झडपमा उग्रतारा जनागाल गाविस-८ का २७ वर्षीय सुरेन पुर्कोटी र २६ वर्षीय शिक्षक मनोज पुर्कोटी घाइते भएका छन् । झडपमा परी प्रहरी जवानहरू चन्द्रकिशोर शाह, गणेश मगर र अशोककुमार गिरी घाइते भएका छन् ।

मृतकका ३८ वर्षीय बावु प्रकाश पुर्कोटीले आजै इलाका प्रहरी कार्यालय बनेपामा मृत्युको कारण नखुले पनि 'ज्यान' शीर्षकमा मुद्दा दर्ता गरेका छन् । विद्यालय प्रशासनको लापरबाहीका कारण छोराको मृत्यु भएकाले अनुसन्धान प्रक्रियाबाट खुल्न आएका सबैलाई कारबाही हुनुपर्ने माग गर्दै उनले निवेदन दिएका छन् । शवको पोष्टमार्टमका लागि आजै शिक्षण अस्पताल काठमाडौँ पठाइएको छ । कोठामा सँगै रहेका उनका ८ जना साथीहरू र वार्डेनलाई प्रहरीले नियन्त्रणमा लिएर सोधपुछ गरेको छ ।

भोजराज तिमल्सिना