समाचारहरू

हुम्ला जिल्लाका सात ओटै गाउँपालिकामा चार महिना बितिसक्दा पनि सामाजिक सुरक्षा भत्ता वितरण नगर्दा स्थानीयबासी मर्कामा परेका छन् । आर्थिक वर्ष०७४/७५ को पहिलो चौमासिकको सुरक्षा भत्ता कात्तिकमै वितरण हुनुपर्ने प्रवधान रहेको भए पनि हालसम्म वितरण नभएको स्थानीयबासीको गुनासो रहेको छ ।

चौमासिक रूपमा वितरण गर्दै आएको सुरक्षा भत्ता चालु आर्थिक वर्षसुरू भए देखि हालसम्म नपाउँदा ज्येष्ठ नागरिक, अपङ्गता भएका व्यक्ति, एकल महिला, ज्येष्ठ नागरिकलाई निकै समस्या भएको सिमकोट गाउँपालिका-७ का ६२ वर्षीय सुरवीर शाहीले गुनासो गरेका छन् ।

हुम्लाका स्थानीय तहले समयमै सामाजिक सुरक्षा भत्ता वितरण गर्न नसक्दा नागरिकहरू निराश बन्न थालेका छन् । हुम्लामा रहेका सात ओटै गाउँपालिकाका ४४ वडामा समयमै सामाजिक सुरक्षा भत्ता वितरण गर्न सकेका छैनन् ।

स्थानीय तहले सामाजिक सुरक्षा भत्ता पाउने नागरिकको तथ्याङ्क समयमै अद्यावधिक गर्न नसक्दा सामाजिक सुरक्षा भत्ता वितरण गर्न नसकेको सिमकोट गाउँपालिकाका प्रमुख पदमबहादुर लामाले बताए । साविकका गाविसमा वितरण हुने सामाजिक सुरक्षा भत्ता पाउँ भन्ने तथ्याङ्क अद्यावधिक नहुँदा वितरण गर्न नसकिएको समेत गाउँपालिका कार्यकारी अधिकृतहरूले खुलासा गरेका छन ।

स्थानीय स्तरमै सरकार पाउँदा पनि धेरैजसो गाउँका स्थानीयबासीलाई स्थानीय सरकार के हो भन्ने समेत थाहा नभएको ताँजकोट गाउँपालिका-२ का परिमल लुहारले बताएका छन् । केन्द्रको सरकार गाउँघरमा भने पनि नागरिकलाई अझै पाउनुपर्ने सेवासुविधा पाउनबाट वञ्चित रहेका छन् ।

नन्द सिंह