समाचारहरू

आगामी मङ्सिर १६ गते हुने उपनिर्वाचनका लागि सुरक्षाका दृष्टिकोणले हुम्लाका चार ओटा मतदान केन्द्र अति संवेदनशील रहेको जिल्ला सुरक्षा समितिले विश्लेषण गरेको छ । जम्मा १३ ओटा मतदान केन्द्रमध्ये चार ओटा मतदान केन्द्र अति संवेदनशील रहेको इन्स्पेक्टर सरोज कँडेलले बताउनु भयो ।

इन्स्पेक्टर कँडेलले तीन ओटा मतदान केन्द्र संवेदनशील र ६ ओटा सामान्य रहेको बताउनु भयो । निर्वाचनलाई निष्पक्ष र भयरहित रूपमा सम्पन्न गर्न नेपाली सेना, सशस्त्र प्रहरी र नेपाल प्रहरी परिचालन गरिने इन्स्पेक्टर कँडेलको भनाइ छ । सुरक्षा संवेदनशीलताका आधारमा निर्वाचन पूर्व, निर्वाचन र निर्वाचन पश्चातको सुरक्षा व्यवस्था मिलाउने तयारी पूरा गरिएको उहाँले बताउनु भयो ।

जसअनुसार सर्केगाड गाउँपालिका–१ स्थित देवल प्रावि तुम्चमा १६ जना, सरस्वती मावि जैरमा दुई ओटा मतदान स्थल गरेर १९ जना, वडा नम्वर २ स्थित लालिगुराँस मावि लिप्नेमा १४ जना, वडा नम्बर ३ स्थित देवकोटा आधारभूत विद्यालयमा १२ जना, वडा नम्बर ४ स्थित हिमज्योति मावि सर्केगाडमा १६ जना, वडा नम्बर ५ स्थित धुमचुली आधारभूत विद्यालय कल्लासमा १२ जना र भवानी अधारभूत विद्यालय गोठीमा १६ जना, वडा नम्बर ६ स्थित स्वयम्भु आधारभूत विद्यालय बराईमा १२ जना र इस्वर आधारभूत विद्यालय छ्यागीमा १२ जना, वडा नम्बर ७ स्थित कोट मावि रोडिकोटमा १६ जना, वडा नम्बर ८ स्थित अंशुबर्मा आधारभूत विद्यालय राहदेवमा १४ जना र निलकण्ठ सामुदायिक प्रावि फुचामा १४ जना प्रहरी परिचालन गरिएको छ ।

उक्त उपनिर्वाचनका लागि २ सय ६८ जना प्रहरी परिचालन गरिएको छ भने उक्त निर्वाचन निर्विवादरुपमा सम्पन्न गराउनका लागि १२ ओटा मतदान स्थलका १३ ओटा मतदान केन्द्रमा ७३ जना कर्मचारी खटाइएकाे मुख्य निर्वाचन अधिकृत सम्भु प्रसाद बरालले बताउनु भयो ।

हुम्लाको सर्केगाड गाउँपालिकाको उपाध्यक्ष पदमा उपनिर्वाचन हुँदैछ । यसका लागि जम्मा ६ जनाले उम्मेदवारी दर्ता गराएका छन् । जसमा ६ हजार ८ सय १० मतदाता सङ्ख्या रहेको जिल्ला निर्वाचन कार्यालयका निर्वाचन अधिकारी भिम रोकायाले बताउनु भयो ।

नन्द सिंह