समाचारहरू

हुम्लाका अधिकांश वडा कार्यालय सचिवविहीन भएपछि स्थानीयबासीका कामकाज ठप्प भएको स्थानीयले गुनासो गरेका छन् ।

सात वटा गाँउपालिकाका ४४ वडामध्ये २९ वडा कार्यालयका सचिवविहीन भएका छन् । एकातिर सचिव कम हुनु र अर्कोतिर खटाएका सचिव पनि अन्यत्रै सरूवा तथा काज मिलाएर जानाले हुम्लाका यति धेरै वडा कार्यालय सचिब बिहिन हुँदा यसवाट स्थानीय भने प्रत्यक्ष प्रभावित भएका छन ।

गाउँपालिका तथा वडापालिकाका कार्यालयमा विभिन्न किसिमका सिफारिस बनाउनको लागि गए पनि सो कार्यालयमा काम गर्ने कर्मचारी नहुदा स्थानीयबासी रित्तो हात लिएर घर फर्कन बाध्य भएको सिमकोट गाउँपालिका-८ का लेखे बुढाले गुनासो गरे ।

सिंहदरवारको अधिकार गाउँगाउँमा पुग्ने भनिएका बेला सिमकोटबाट चार दिन पैदल लाग्ने ताँजाकोट गाँउपालिकामा यो समस्या झन् कहाली लाग्दो देखिएको छ ।

६ वटा वडा भएको ताँजाकोटमा एक जना वडा सचिव र एक जना निमित्त प्रशासकीय अधिकृत हुँदा सबै काममा कर्मचारीको अभावले जनताको काम गर्न समस्या भएको सो पालिकाका अध्यक्ष बाग्दल मल्लले बताए ।

उनले भने-'आर्थिक वर्ष सम्पन्न भएको सात महिना बितिसक्दा पनि पालिकाका योजनाको काम अगाडि बढाउन नसकिएको र वडाको झन् लथालिङ्ग अवास्थामा रहेको छ ।'

सबैभन्दा बढी वडा भएको सर्केगार्ड गाँउपालिकामा तीन जना सचिव मात्र भएकाले वडा अध्यक्षले सचिवको जिम्मेवारी निर्वाह पनि गर्नु परेको वडा नम्वर पाँचका अध्यक्ष कर्णजङ्ग शाहीले बताए ।

राज्यले सिंहदरवारको अधिकार गाउँगाउँमा पुगेको जनाए पनि हुम्लाका दुर्गम बस्तीमा अहिले पनि त्यो भनाइ लागु नभएकोले जनताले सास्ती खेप्नु परेको अध्यक्ष शाहीको भनाइ रहेको छ ।

चौबीसै घण्टा जनाताको काममा खटिनु परेको उनले बताए । यता आठ वटा वडा भएको सिमकोट गाँउपालिकामा पनि चार जना सचिव भएको र चारवटा वडा सचिवविहीन भएको सिमकोट गाँउपालिकाका प्रशासकीय अधिकृत अर्जुन दर्जीले बताए । एक वडाबाट अर्को वडा पुग्न एक दिन पैदल हिँड्नु पर्ने भएका कारण कर्मचारी अभावले काम गर्न गाह्रो भएको दर्जीले बताए ।

अर्को एक वडाबाट अर्को वडामा पुग्न तीन दिनसम्म पैदल लाग्ने नाम्खागाँउ पालिकाका ६ वटा वडाका लागि एक जना सचिव र एक जना निमित्त प्रशासकीय अधिकृत मात्र रहेका छन् । कर्मचारी तालमेल नमिल्दा काम गर्न समस्या भएको सो पालिकाका अध्यक्ष विष्णुबहादुर लामाले बताए ।

हुम्ला जिल्लाका सात वटा गाउँपालिकामा ४४ वटा वडाहरूमध्ये १५ जना मात्र वडा सचिव भएको र बाँकी २९ वडा कार्यालयहरू सचिवविहीन रहेका छन् । यी वडाहरूमा निमित्त र केहीमा भने वडा अध्यक्षले काम गर्दै आएको खार्पुनाथ गाँउपालिकाका अध्यक्ष कर्णबहादुर रावलले बताए ।

नन्द सिंह