समाचारहरू

गत पुस महिनादेखि नाम्खा गाउँपालिका–४ स्थित यालवाङमा रहेको हिमाली बाल समाज छात्राबासका बालबालिकाले खाद्यान्नको अभाव भएको छात्राबास सञ्चालक कुमार लामाले गुनासो गर्नु भएको छ ।

खाद्यान्न नपाउँदा सो छात्राबासका २ सय २५ जना बालबालिका र १५ जना शिक्षकहरू खाद्यान्नबाट वञ्चित हुनु परेको सञ्चालक लामाको भनाइ छ ।

उहाले भन्नु भयो–‘तीन वर्षदेखि कोभिडका कारण चीनको सिमा हिल्सा नाका बन्द भएपछि खाद्यान्नको समस्या भएको हो ।’

गत ६ महिनादेखि विद्यार्थी र शिक्षकहरुले नेपाल सरकारको अनुदानमा आएको खाद्यान्न नपाउँदा सास्ती खेप्नु परेको लामाले दुःख व्यक्त गर्नु भयो ।

लामो समय खाद्यान्न उपलब्ध नभएको भन्दै जेठ २० गते जिल्ला प्रशासन कार्यालयमा छात्राबासका सञ्चालक लामाले खाद्यान्नको माग गर्नु भएको छ ।

सिमकोट, सर्केगाड र नाम्खा गाउँपालिकाका गरिब, विपन्न, जेहेन्दार बालबालिकाहरू यहाँको छात्राबासमा बस्दै आएका छन् ।

लामाले खाद्यान्नको माग गरेपछि प्रमुख जिल्ला अधिकारी सीता परियारले अबदेखि सो छात्राबासका लागि नियम अनुसार मासिक रूपमा पाउने खाद्यान्न उपलब्ध गराउने प्रतिबद्धता जनाउनु भयो ।

नन्द सिंह