समाचारहरू

हिमा गाउँपालिकामा एक हप्तादेखि टेलिफोन सेवा अबरुद्ध हुँदा निर्वाचनसँग सम्बन्धीत सूचना आदनप्रदानमा समस्या भएको छ ।

नेपाल टेलिकम जुम्लाका अनुसार हिमा गाउँपालिकाको कुडु गाउँस्थित रहेको टावरको हर्नमा समस्या भएपछि टेलिफोन सेवा अवरुद्ध भएको हो ।

निर्वाचनको समयमा टेलिफोनमा अवरुद्ध हुँदा सूचना आदनप्रदान गर्न समस्या भएको मुख्य निर्वाचन अधिकृतको कार्यालय, जुम्लाका सहायक निर्वाचन अधिकृत तोयानाथ उपाध्यायले बताउनु भयो । उहाँले भन्नुभयो मुख्य निर्वाचन अधिकृतको कार्यालयले यस पालिका स्तरमा रहेका निर्वाचन अधिकृतको कार्यालयमा समन्वय गर्नु पर्दछ । तर हिमा गाउँपालिकामा टेलिफोन सेवा नहँुदा समस्या भएको हो ।

यस्तै चुनावको मुखमा आपसी संचार र समन्वय गर्न कठिन भएको राजनीतिक दलहरूले समेत बताएका छन् । अर्कोतिर विरामी भएका व्यक्तिलाई अस्पताल ल्याउन पनि संचार समस्याले एम्वुलेन्स तत्काल पठाउन नसकिने भएको छ । हिमा गाउँपालिका प्रमुख प्रशासकीय अधिकृत रणबहादुर बुढाले टेलिफोन नहुँदा समस्या भएको बताउनु भयो । उहाँले भन्नुभयो “एक हप्तादेखि फोन सेवा अवरुद्ध छ । यसले गर्दा दैनिक कामकाज गर्न समेत असहज भएको छ ।”

उक्त पालिकामा प्रहरीको सेटले समेत काम नगरेको जिल्ला प्रहरी कार्यालय, जुम्लाका डीएसपी नरेन्द्र चन्दले जानकारी दिनु भयो ।
नेपाल टेलिकम जुम्लाका कार्यालय प्रमुख रामचन्द्र श्रेष्ठका अनुसार टावरको हर्न क्षति हुनुका साथै सामग्री पनि नभेटिएकाले सो सामान काठमाडौँबाट मगाइएको छ । उहाँले भन्नुभयो, सामग्री जहाजमा आउने भएको छ । उहाँले त्यो सामग्री काठमाडौंबाट नेपालगञ्ज पुगेको बताउनु भयो । उहाँले भन्नुभयो अब जहाजबाट जुम्ला ल्याएर जोडिने छ । टेलिफोन बिग्रिएको खबर पाएपछि नेपाल टेलिकमको टोली हिमा गाउँपालिकामा पुगेर फर्किएको छ ।

आसन्न वैशाख ३० गते सम्पन्न हुने स्थानीय तहको निर्वाचन नजिकिदै गएपछि राजनीतिक दल, मतदाता र निर्वाचन आयोग निकै तातिएका छन् । स्थानीय तहको निर्वाचन आउन सात दिन मात्रै बाँकी रहदा जुम्लामा चुनावी गतिविधि उत्सर्गमा पुगेको देखिन्छ ।

मानदत्त रावल