समाचारहरू

हिमाली जिल्ला डोल्पामा स्थानीय तह निर्वाचनका लागि नमूना मतदान कार्यक्रम वैशाख २७ गते सम्पन्न भएको छ ।

सदरमुकाम दुनैस्थित ठुलीभेरी नपा अन्तर्गत सरस्वती उमावि मदतान केन्द्र र त्रिपुरासुन्दरी नपास्थित धर्मशाला चौरमा नमुना मतदान भएको हो । त्रिपुरासुन्दरी नपा अन्तर्गतको धर्मशाला चौरमा जम्मा खसेको ५१ मतमा ४९ वटा मत सदर र २ वटा मत बदर भएको थियो । धर्मशाला चौरमा सम्पन्न भएको नमुना मतदान कार्यक्रममा ३४ जना महिला र १७ जना पुरुषले सहभागिता जनाएका थिए ।

त्यसैगरि ठुलीभेरी नपा अन्तर्गतको सरस्वती उमाविको मतदान केन्द्रमा भएको मतदानमा जम्मा खसेको ४५ मत मध्ये ३४ वटा मत सदर र ११ वटा मत बदर भएका थिए । सो मतदान केन्द्रमा २५ महिला र २० जना पुरुषले सहभागिता जनाएका थिए । डोल्पामा रहेका २ नपा र ६ गाँउपालिका मध्ये २ वटा केन्द्र तोकेर नमुना मतदान कार्यक्रम गरिएको हो ।

डोल्पामा मतदाता शिक्षाको प्रभावकारीता र मतदाताको दक्षताको पूर्व अनुमानका लागि नमूना मतदान गरिएको निर्वाचन कार्यालयबाट नमूना मतदान कार्यक्रममा खटिएका कर्मचारी नवराज शर्मा उपाध्यायले बताए ।

विष्णु देवकोटा