समाचारहरू

बढ्दो महिला हिंसा न्यूनीकरणका लागि सरोकारवालाको महत्वपूर्ण भूमिका रहनेमा एक कार्यक्रमका सहभागीहरूले जोड दिएका छन् ।

राष्ट्रिय मानव अधिकार आयोग, इन्सेक, शान्तिका लागि नागरिक समाजको सञ्जाल र कोक्यापले लैङ्गिक हिंसा विरूद्धको १६ दिने अभियानका अवसरमा मङ्सिर १७ गते पोखरामा संयुक्त रूपमा आयोजना गरेको अर्न्तक्रिया कार्यक्रमका सहभागीले सो कुरामा जोड दिएका हुन् ।

कार्यक्रममा अञ्चल प्रहरी कार्यलयका डिएसपी डिल्लीराज पन्तले महिला हिंसा न्यूनीकरणका लागि ग्रामीण स्तरसम्म सचेतनामूलक कार्यक्रमहरू सञ्चालन गर्नुपर्ने बताए । उनले सार्वजनिक यातायातमा महिलाहरूलाई हुने दुर्व्यवहार न्यूनीकरणको लागि प्रहरी, नागरिक समाज र अधिकारकर्मीको संयुक्त पहलमा अभियान नै सञ्चालन गर्नु पर्ने बताए ।

कार्यक्रममा महिला तथा बालबालिका कार्यलय कास्कीकी प्रमुख लक्ष्मी जिसी कार्कीले महिला हिंसा विरूद्ध सबै प्रतिवद्ध भएर अघि बढ्नु पर्ने बताइन् । इन्सेक पश्चिमाञ्चल क्षेत्रीय कार्यलयका संयोजक शिव खकुरेलले मानव अधिकार उल्लङ्घन तथा ज्यादतीका घटनामा महिला हिंसाका घटनाहरू बढी आउने गरेको बताउँदै हिंसा न्यूनीकरणको लागि दण्डहिनताको अन्त्य हुनुपर्ने बताए ।

 

इन्सेक पश्चिमाञ्चल क्षेत्रीय कार्यलय पोखरा