समाचारहरू

जुम्ला सदरमुकाम खलङ्गा बजारदेखि उत्तरी भेगमा पर्ने सिंजा उपत्यकामा तीन ओटा गाउँपालिका पर्दछ ।

सिंजा उपत्यकामा हिमा, सिंजा र कनकासुन्दरी गाउँपालिका छन् । कनकासुन्दरी गाउँपालिका सदरमुकाम खलङ्गादेखि झण्डै ७० किलोमिटर पर्दछ ।

यो क्षेत्रमा सामान्य उपचार गर्न स्वास्थ्यचौकी बाहेक अस्पताल नभएका कारण उपचारका लागि कनकासुन्दरी गाउँपालिकास्थित हाँडसिंजामा १५ शैयाको अस्पताल निर्माण गर्नका लागि ०७७ माघ २ गते शिलान्यास गरिएको हो ।

तर, शिलान्यास गरिएको अवस्था उस्तै छ । शिलान्यास गरेदेखि अस्पताल निर्माणका लागि एक ढुङ्गासमेत थपिएको छैन ।

केपी शर्मा ओली प्रधानमन्त्री हुँदा सङ्घीय सरकारको स्वास्थ्य मन्त्रालयको बजेटमा हाँडसिंजामा १५ शैयाको अस्पताल शिलान्यास गरिएको थियो ।

अस्पताल निर्माण गर्न सङ्घीय स्वास्थ्य मन्त्रालयबाट १८ करोड ५० लाख रुपियाँ विनियोजन भएको थियो ।

शिलान्यास भएको अस्पताल निर्माण नहुँदा यहाँका सेवाग्राही कर्णाली स्वास्थ्य विज्ञान प्रतिष्ठान शिक्षण अस्पतालसम्म उपचार गर्न जानु पर्ने बाध्यता भएको हाँडसिंजा स्वास्थ्यचौकीका इञ्चार्ज वीरेन्द्र उपाध्यायले बताउनु भयो ।

उहाँले भन्नु भयो–‘समयमा अस्पताल निर्माण अपेक्षा गरिएको थियो । तर, अहिले अलपत्र अवस्थामा परेको छ । यहाँका नागरिक बिरामी हुँदा वर्षात्को समयमा बाढीपहिरोको जोखिम मोलेर कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा उपचार गर्न जान बाध्य छन् ।’

अस्पताल बनाउन २२ जना स्थानीयले ३ हजार ५ सय वर्गमिटर जग्गा निःशुल्क उपलब्ध गराएका छन् ।

नजिकै अस्पताल भएपछि सहज रुपमा उपचार गर्न पाइने आशाले निःशुल्क जग्गा दिएको स्थानीय भक्त न्यौपाने बताउनु भयो ।

उहाँले भन्नुभयो–‘शिल्यान्यास भएको लामो समय बितिसक्दा पनि अस्पताल निर्माणका लागि न त जग खनिएको छ । न त एउटा ढुङ्गा नै फालिएको छ ।’

कनकासुन्दरी गाउँपालिकाका प्रमुख प्रशासकीय अधिकृत तिर्थबहादुर कठायतका अनुसार गत आर्थिक वर्ष ०७८÷०७९ मा अस्पताल निर्माणका लागि ३ करोड ५० लाख रुपियाँ आएको थियो ।

उहाँले भन्नु भयो–‘ठेकेदारको बेमाइनीका कारण अस्पताल निर्माणको कार्य थालनी भएको छैन । १ करोड ५० लाख रुपियाँ आयोजनाको पेश्की गएको छ । अरु सबै बजेट फ्रिज भएको हो ।’

मानदत्त रावल