समाचारहरू

त्रियुगा नगरपालिका-१२ पुरानो गाइघाटका आठ वर्षीय बालक आयन लिम्बूलाई कुटपिट गरी हत्या प्रयास गरेको आरोपमा जिल्ला अदालतले त्रियुगा नगरपालिका-१२ सुनगाभाटोलका अधिवक्ता ५५ वर्षीय इन्द्रकुमार तामाङ्गलाई एक वर्ष कैद सजायको फैसला सुनाएको छ ।

जिल्ला अदालतका न्यायाधीश कृष्णप्रसाद सुवेदीको जेठ १७ गतेको इजलासले कसुर गरेको ठहर गर्दै कैद सजायसँगै १० हजार जरिबाना र पीडितले पाउने गरी कसुरदारबाट ३ लाख रुपियाँ क्षतिपूर्ति भराउन आदेश भएको अदालतका श्रेष्तेदार धनबहादुर कार्कीले बताउनु भयो ।

पीडित बालकलाई आरोपितले आफ्नो घर अगाडि सङ्कलन गरेर राखेको बालुवा छरेको निहुँमा ०७७ असार २२ गते निर्घात कुटपिट गरेका थिए ।

आरोपितविरूद्ध पीडित बालककी आमा सम्झना तामाङ्गले असार २३ गते जिल्ला प्रहरी कार्यालयमा उजुरी दिनु भएको थियो ।

पीडित पक्षको उजुरीका आधारमा आरोपितलाई प्रहरीले असार २३ गते घरबाटै गिरफ्तार गरी जिल्ला अदालतमा ज्यान मार्ने उद्योग शीर्षकमा ०७७ साउन ११ गते मुद्दा दर्ता गरेको थियो ।

जिल्ला अदालतका न्यायाधीश दीपक खनालको साउन १२ गतेको आदेशमा आरोपित ३ लाख रुपियाँ धरौटी बुझाएर सोही दिन रिहा भएका थिए ।

कसुरदारको कुटपिट र ढुङ्गा प्रहारबाट टाउकोमा चोट लागेका बालकको उपचार जिल्ला अस्पतालमा गरिएको थियो ।

राकेश नेपाली