हत्या घटनाको कसुर ठहर गरिएका व्यक्ति गिरफ्तार

  ०७८ साउन २९ गते

बलात्कारपछि जन्मेको शिशुको हत्या गरेको कसुरमा जिल्ला अदालतबाट सर्वश्वसहित कैद फैसला सुनाइएका आवुँखैरेनी गाउँपालिका–१ कुसुन्डेडाँडाका ५१ वर्षीय प्रेमबहादुर सार्कीलाई प्रहरीले १८ वर्षपछि गिरफ्तार गरेको छ ।

घटनापछि ‘फरार’ रहेका सार्कीलाई साउन २७ गते प्रहरीले घरैबाट गिरफ्तार गरेको जिल्ला प्रहरी कार्यालय तनहुँका डिएसपी युवराज तिमल्सिनाले बताउनु भयो ।

बलात्कारपछि गर्भमा रहेको शिशुको गर्भपतनका लागि औषधि खुवाए पनि उक्त शिशु जिवित जन्मेपछि तत्कालै खरबारीमा लगेर शिशुको घाँटी थिचेर हत्या गरेको कसुर तथा बलात्कार पीडित महिलाको बयान र स्थानीय भानुभक्त भट्टराईको उजुरीपछि तनहुँ जिल्ला अदालतमा दर्ता भएको मुद्दामा जिल्ला अदालतले सार्कीलाई २०६० वैशाख ११ गते सर्वश्वसहित जन्मकैदको सजाय सुनाएको थियो ।

सो मुद्दालाई पुनरावेदन अदालतल पोखराले २०६० कात्तिक १८ गते सदर गरेको थियो ।

घटनापछि फरार रहेका सार्कीलाई खोजी गरिएपनि फेला परेका थिएनन् । साउन २७ गते गिरफ्तार भएका सार्कीलाई सोही दिन जिल्ला अदालतमा उपस्थित गराई सजायका लागि जिल्ला कारागार पठाइएको डिएसपी तिमल्सिनाले इन्सेक प्रतिनिधिलाई बताउनुभयो ।

शिशु हत्या घटनामा संलग्न रहेको कसुरमा बलात्कार पीडित महिला यसअघि नै सजाय पूरा गरी रिहा भइसकेको डिएसपी तिमल्सिनाले जानकारी दिनु भयो ।


प्रकाशचन्द्र भट्टराई