समाचारहरू

जिल्ला कारागार कार्यालय सुरक्षार्थ कार्यरत सशस्त्र प्रहरी जवान घोराही उमनपा–७ का २८ वर्षीय जुगरु चौधरीको हत्या गरेको आरोपमा प्रहरीले घोराही उपमनपा–५ का ५५ वर्षीय शेरबहादुर केसीलाई कात्तिक २५ गते  गिरफ्तार गरेको छ ।

तिहारको बिदामा घर गएका  चौधरीलाई कात्तिक २३ गते भरुवा बन्दुकले गोली प्रहार गरी हत्या गरेको भन्दै पीडित पक्षले कात्तिक २४ गते जिल्ला प्रहरी कार्यालयमा उजुरी दिएका थिए ।

उजुरीका आधारमा प्रहरीले आरोपित केसीलाई घरबाट एक थान बन्दुक र १ सय ७५ थान सिसाका गोलीसहित गिरफ्तार गरेको जिल्ला प्रहरी कार्यालयका डिएसपी जनकबहादुर मल्लले जानकारी दिनुभयो ।

स्थानीयहरूसँग घोराही उपमनपा–५ स्थित जनसेवा सामुदायिक बनमा मालुका पात टिप्न गएका चौधरी बनमै मृत भेटिएपछि प्रहरीले चौधरीसँगै  पात टिप्न गएका १४ जनालाई गिरफ्तार गरेको थियो ।

अनुसन्धानको क्रममा शेरबहादुरलाई बन्दुकसहित गिरफ्तार गरेको र आरोपितले शिकार खेल्न गएको बेला बादरजस्तो मानेर गोली हानेको बताएपछि १४ जनालाई कात्तिक २५ गते रिहा गरेको थियो ।

शवलाई पोष्टमार्टमका लागि राप्ती स्वास्थ्य विज्ञान प्रतिष्ठान घोराहीमा राखिएको छ ।

चाडपर्वको बेला भएकाले डाक्टर आउन ढिला भएका कारण  पोष्टमार्टममा ढिलाई भएको घोराही उपमनपा–७ का अध्यक्ष खोपीराम चौधरीले जानकारी दिनुभयो ।

जयनारायण पुन