समाचारहरू

वालिङ–१२ सिर्सेकोट घर भई हाल वालिङ–१० भकुण्डे बस्ने डेढ वर्षीय  साईमन गुरुङको हत्या गरेको आरोपमा प्रहरीले पर्वतको पैयूँ गाउँपालिका–५ घर भई हाल वालिङ–१० भकुण्डे बस्ने ३३ वर्षीय जितेन्द्र गुरुङलाई पुस २८ गते गिरफ्तार गरेको छ ।

मृतकलाई आरोपितले पुस २८ गते चक्कु प्रहार गरी हत्या गरेको र मृतककी पाचँ वर्षीया दिदी साइना गुरुङलाई पनि चक्कु प्रहार गरी घाइते बनाएको भन्दै मृतकका ५५ वर्षीय हजुरबुबा प्रेमबहादुर गुरुङले सोही दिन आरोपितविरुद्ध वडा प्रहरी कार्यालय वालिङमा उजुरी दिएको वडा प्रहरी कार्यालयका इन्स्पेक्टर हरिप्रसाद पौडेलले बताउनुभयो ।

घाइते साइनाको घाँटीको अगाडिको भागमा चोट लागेको छ भने चक्कु प्रहारबाट गम्भीर घाइते भएका साइमनलाई गह्रौँ प्राथमिक स्वास्थ्य केन्द्रले मृत घोषणा गरेको थियो ।

आरोपितलाई गिरफ्तार गरी घटनाको अनुसन्धान गरिरहेको जिल्ला प्रहरी कार्यालय स्याङजाका इन्स्पेक्टर राजेन्द्र अधिकारीले जानकारी दिनुभयो ।

घाइते साइनालाई उपचारपछि घर पठाइएको छ भने मृतकको शवको पोष्टमार्टम पुस २८ गते गह्रौँ प्राथमिक स्वास्थ्य केन्द्रमा गरियो ।

तिलकुमारी थापा