हत्या घटनाका आरोपितहरू विरुद्ध उजुरी

  ०८१ वैशाख ४ गते

बहुदरमाई नपा–३ नगरदाहा की २४ वर्षीया निशा भनिने बसन्ती कुमारी साहको हत्या गरेको आरोपमा पीडित पक्षले पति २५ वर्षीय इनरजित भनिने इन्द्रजित साह गोढ र इन्द्रजितका बाजे ६० वर्षीय मंसि साहविरुद्ध ०८१ वैशाख १ गते जिल्ला प्रहरी कार्यालयमा उजुरी दिएका छन् ।

“तीन महिनाको गर्भवती समेत रहेकी निशालाई वैशाख १ गते लात र मुक्का प्रहार गरी आरोपितहरूले कुटपिट गरेका थिए । कुटपिटका कारण घाइते भएकी निशालाई उपचारको लागि वीरगंजस्थित अस्पताल लग्ने क्रममा बाटोमा मृत्यु भएको”–मृतकका बुबा सखुवा प्रसौनी गाउँपालिकाको वडा नं. २ सखुवा जमुनियाका ५२ वर्षीय हिरालाल साह बताउनु भयो । छोरीलाई उनका परिवाजनले नियोजित ढङ्गले हत्या गरेको पीडित बुबाको आरोप रहेको छ ।

त्यस्तै “आफूहरू घटना भएकै दिन आरोपितहरू विरुद्ध प्रहरीमा उजुरी दिएपनि प्रहरीले आरोपतिहरूलाई गिरफ्तार नगरेको पीडित पक्षले वैशाख ४ गते वीरगंजमा पत्रकार सम्मेलन मार्फत आफ्नो दुःखेसो सुनाउनु भयो ।

यता मृतकका पतिका अनुसार वैशाख १ गते अचानक पेट दुखेर बेहोस भएकी निशालाई उपचारको लागि अस्पताल लग्ने क्रममा उनको मृत्यु भयो । आफूले वा आफ्नो परिवारको कसैले पनि निशालाई कुटपिट नगरेको उहाँले बताउनु भयो ।

शवको पोष्टमार्टम सोही दिन वीरगंजस्थित नारायणी अस्पतालमा गरिएको जिल्ला प्रहरी कार्यालयका डिएसपी कुमार बिक्रम थापाले जानकारी दिनु भयो । साथै पोष्टमार्टम रिपोर्ट आएपछि मात्र घटना बारे केही भन्न सकिने उहाँले बताउनु भयो ।


शम्भुकुमार सुमन