समाचारहरू

हनुमाननगर कंकालिनी नगरपालिका–५ योगिनियाका १७ वर्षीय रूपेश मुखियाको हत्या आरोपमा सोही ठाउँका २२ वर्षीय लबकुमार मुखिया र १९ वर्षीया सुरजकुमार मुखिया ०८० माघ २९ गते गिरफ्तार भएका छन् ।

पुषी पुर्णिमाको मेला हेर्न माघ ११ गते सँगै सप्तकोशी नदीको ब्यारेज गएका आरोपितहरूले हत्या गरेको भन्दै मृतकका बुबा चन्द्रदेब मुखियाले माघ २६ गते जिल्ला प्रहरी कार्यालयमा दिएको उजुरीका आधारमा गिरफ्तार गरिएको सप्तरी प्रहरीले जनाएको छ । जिल्ला प्रहरी कार्यालयले माघ २९ गते हत्या आरोपमा उजुरी दर्ता गरी आरोपितहरूलाई हिरासतमा राखेको छ ।

मुखियाको शव हनुमाननगर कंकालिनी नगरपालिका–१ भारदहस्थित कोशी ब्यारेजमा माघ २० गते फेला परेको थियो । शवको पोष्टमार्टम धरानस्थित बि.पी. कोइराला स्वास्थ्य विज्ञान प्रतिष्ठानमा माघ २१ गते भयो । कोशी मेलाबाट माघ १२ गते विहान घर फर्किएका आरोपितहरूलाई गाउँलेहरूले केरकार गर्दा उनीहरूले शंकास्पद भनाई राखेपछि प्रहरीको जिम्मा लगाइएको थियो । आरोपितहरूको कपडा भिजेको, हिलो लागेको र शरिरका विभिन्न भागमा चोट देखिएको शकुन्ती देबी मुखियाले बताउनु भयो । शंकास्पद आरोपितहरूलाई प्रहरीले माघ १२ गते अभद्र व्यवहारमा उजुरी दर्ता गरी अनुसन्धान चलाएको थियो ।

मनोहरकुमार पोखरेल