समाचारहरू

धनुषाको गणेशमान चारनाथ नगरपालिका-६ गोदार की २८ वर्षीया लक्ष्मीनिया देवी मण्डलको हत्या गरेको आरोपमा ०८१ कात्तिक १५ गते मटिहानी नगरपालिका-५ का २२ वर्षीय राकेश नायक र निजका पत्नी २५ वर्षीया रीनादेवी महराविरुद्ध पीडित पक्षले जिल्ला प्रहरी कार्यालय महोत्तरीमा उजुरी दिनुभएको छ ।

आरोपितहरूलाई कात्तिक १३ गते सर्लाहीको सिमरा गाउँपालिका-७ सिन्हराबाट प्रहरीले गिरफ्तार गरेको छ ।

शवको पोष्टमार्टम कात्तिक १५ गते पादेशिक अस्पताल जलेश्वरमा भइ शव मृतकका पति रामनाथ मण्डललाई जिम्मा लगाएको जिल्ला प्रहरी कार्यालयका इन्स्पेक्टर विशाल सिंहले जानकारी दिनुभयो ।

मृतकको शव पिपरा गाउँपालिका-७ दनौली चौरीस्थित अशोक ठाकुरको आँपको बगैचामा परिचय नखुलेको अवस्थामा कात्तिक १३ गते फेला परेको थियो । प्रारम्भिक अनुसन्धानपश्चात मृतकको परिचय खुलेको इन्स्पेक्ट सिंहले जानकारी दिनुभयो ।

इन्स्पेक्टर सिंहका अनुसार आरोपित नायक र लक्ष्मीनीया प्रेम सम्बन्धमा थिए । प्रेम सम्बन्धको क्रममा भदौ २६ गते दुवै जना भागेर भैरहवा गएका थिए र कात्तिक ३ गते  घर फर्केपछि आरोपित रीनादेवी महरा र लक्ष्मीनीयाबीच विवाद भएपछि लक्ष्मीनीया घर छाडेर गएकी थिइन् । घर छोडेर गएकी लक्ष्मीनीयालाई आरोपितहरूले बाटोमै उनले लगाएको सलले घाँटी थिची हत्या गरी अनुहार जलाउन प्रयास गरेको प्रहरीको भनाइ छ ।

घटनाको विषयमा थप अनुसन्धान गरिरहेको इन्स्पेक्टर सिंहले बताउनु दिनुभयो ।

ममता विश्वकर्मा