समाचारहरू

जिल्लाको दुर्गम उत्तरी क्षेत्र भोटखोलामा रहेको हटियागोला खाद्य डीपोमा चामल अभाव भएको छ ।

वार्षिक खाद्यान्न कोटा ५ सय क्विन्टल मात्र भएकाले स्थानीयले अनुदानको चामल पाउन सकेका छैनन् । दुर्गम उत्तरी क्षेत्र भोटखोलामा रहेको हटियागोला खाद्य डिपोमा १५ महिनायता चामल अभाव हुँदा समस्या भएको हो । दुर्गम उत्तरी क्षेत्र भोटखेला क्षेत्रमा आलु र कोदो, फापरमात्र उत्पादन हुन्छ । भोटखोला क्षेत्रमा उत्पादन भएको खाद्यान्नले तीन महिना मात्र पुग्ने गरेको छ ।

दशैँको मुखमा जिल्लाको दुर्गम उत्तरी क्षेत्रमा खाद्य व्यवस्था तथा व्यापार कम्पनी लिमिटेडले अनुदानको चामल पठाउन सकेको छैन । हटियागोला खाद्य डिपोमा गत वर्षदेखि चामल अभाव हुदाँ समस्या भोटखोला गाउँपालिका अध्यक्ष वाङछेदर भोटेले बताउनु भयो ।

जिल्ला प्रशासन कार्यालयमार्फत प्रादेशिक खाद्य व्यवस्था तथा व्यापार कम्पनी लिमिटेड कार्यालय, विराटनगर र केन्द्रीय कार्यालय, काठमाण्डौँलाई पत्राचार गरिएको भएपनि चाडवाडको समयमा समेत हटियागोला खाद्य डीपोमा चामल नआएको गाउँपालिका अध्यक्ष भोटेको गुनासो गर्नु भयो ।

हटियागोला खाद्य डीपोमा चामल अभाव भएको र किमाथाङ्का नाका सीमापारिको चीनको चाँगामा पहिरोका कारण नाका बन्द हुँदा भोटखोलाका बासिन्दालाई थप समस्या भएको वडाध्यक्ष भोटेले बताउनु भयो । भोटखोला गाउँपालिकाका अधिकांश नागरिक खाद्यान्नलगायत दैनिक उपभोग्य वस्तुका लागि सीमावर्ती चीनियाँ बजार चाँगा र देन्दाङमा निर्भर रहँदै आएका छन् ।

छिमेकी देश चीनको चाँगामा पहिरो गएका कारण ०८१ असोज १२ गतेदेखि आवतजावत रोक लगाइएको हो । विराटनगरमा रहेको खाद्य व्यवस्था तथा व्यापार कम्पनी लिमिटेडको प्रादेशिक कार्यालयले समयमा अनुदानको चामल नपठाउँदा दुर्गम उत्तरी क्षेत्र भोटखोलामा खाद्यान्न समस्या भएको हो ।

सदरमुकाम खाँदबारीमा १ हजार ५ सय क्विन्टल र उत्तरी क्षेत्र भोटखोलामा ५ सय क्विन्टलको कोटा तोकिएको छ । सदरमुकाम खाँदबारीमा सुपथ मूल्य पसल सञ्चालित हुँदा भोटखोलामा भने चामल अभाव भएको छ ।

भविन कार्की