समाचारहरू

आगामी मङ्सिर १० गते हुने प्रदेश सभा र प्रतिनिधि सभा निर्वाचनका लागि सङ्खुवासभामा दलका उम्मेदवारहरूले स्वीकृति बिना नै सवारी साधन प्रयोग गरिरहेको पाइएको छ ।

प्रदेश सभाको लागि आठ दल र प्रतिनिधि सभाका लागि सङ्खुवासभामा १० ओटा दलले उम्मेदवारी दिएपनि अहिले चुनावी प्रचारप्रसारका लागि कुनै पनि उम्मेदवारले सवारी स्वीकृति नलिएको मुख्य निर्वाचन अधिकृतको कार्यालयले जनाएको छ ।

नेपाली काङ्ग्रेस प्रतिनिधि सभा सदस्य पदका उम्मेदवार दिपक खड्काले को १ ज २२५० नम्बरको गाडि अनुमति नलिई प्रयोग गरेको भेटिएको छ भने वाम गठबन्धनका प्रतिनिधि सभा सदस्य पदका उम्मेदवार राजेन्द्र गौतमले बा १० च ५२०७ नम्बरको गाडी प्रयोग गरिरहेका छन् । त्यस्तै प्रदेश सभातर्फा उम्मेदवारहरूले पनि स्वीकृति बिना नै सवारी प्रयोग गरिरहेका छन् ।

निर्वाचन आयोगले जारी गरेको आचारसंहिता अनुसार परिच्छेद २(ख) अनुसार प्रतिनिधि सभाका एक उम्मेदवारले चार ओटा गाडी र चार ओटा मोटरसाइकल तथा प्रदेश सभातर्फ एक उम्मेदवारले दुई ओटा गाडी र दुई ओटा मोटरसाइकल प्रयोग गर्न पाउने प्रावधान रहेको छ ।

सवारी स्वीकृत लिनका लागि सबै दलका उम्मेदवारले फारम लगेता पनि अहिलेसम्म नबुझाएकाले स्वीकृति बिनै सवारी प्रयोग गरिरहेको हुनसक्ने मुख्य निर्वाचन अधिकृत प्रकाश राउतले बताए ।

बाबुराम बास्तोला