समाचारहरू

जयमङ्गलापुर, सम्भौता र मिजापुर गाविसमा एउटा पनि बर्थिङ सेन्टर नहुँदा प्रसुती सेवा लिने महिलाहरू समस्यामा परेका छन् ।

यी गाउँका सेवाग्राही महिलाहरू गाउँमा स्वास्थ्य सेवा नभएका कारण सीमावर्ती भारतीय क्षेत्र जान बाध्य भएको बताउँछन् ।

जयमङ्गलापुर गाविसमा मात्रै एक वर्षमा १ सय ४४ महिलालाई सेवा दिने स्वास्थ्य चौकीको लक्ष्य रहेको प्रमुख रामेश्वर रामले बताए । उनले बर्थिङ् सेन्टर नभएकोले सुत्केरी गराउन समस्या भएको बताए ।

जयमङ्गलापुर गाविसका नथुनी सिंहले गाउँमा सेवा नभएको र वीरगञ्जसम्म पुग्ने बाटो खराब भएकाले निकै कष्ट व्यहोर्नु परेको बताइन् ।

उपचारको लागि यहाँका बिरामीलाई खटियामा राखेर अस्पताल लाने गरिएको मिर्जापुरका अच्छेलाल यादवले बताए ।

स्थानीय स्तरमा रहेका स्वास्थ्य चौकीहरूमा दरबन्दी अनुसार स्वास्थ्यकर्मीहरू नभएकाले यस्तो समस्या भोग्नुपरेको यादवले बताए ।

जयमङ्गलापुर उप-स्वास्थ्य चौकीमा ६ जनाको दरबन्दी भएपनि दुई जना मात्र कार्यरत छन् । 'कार्यरतमध्ये अहेव कार्यालय आउँनुहुन्छ । अनमि हसवु नेसा भने स्वास्थ्य चौकीमा आउनुहुन्न ।'-स्थानीय सुबोध सिंहले बताए ।

स्वास्थ्य चौकीका प्रमुख रामेश्वर रामले नेसा नआउने कुरा स्वीकार गरेका छन् । उनले भने-'उनी नआउँदा आमा सुरक्षा कार्यक्रम नै प्रभावित भएको छ ।' स्वास्थ्य चौकी नजिकको गाउँ निवासी भएपनि नेसा चौकीमा नआउँदा खोपहरू नियमित रूपमा सञ्चालन हुन नसकेको स्वास्थ्य चौकी प्रमुख रामको भनाइ छ ।

स्वास्थ्य सेवा ऐनले नौ महिनामा पाँच दिन खोप क्लिनिक र गाउँघर क्लिनिक सञ्चालन गर्नुपर्ने व्यवस्था गरेको छ । तर, जयमङ्गलापुरमा तोकिएको महिनामा सेवाग्राहीले खोप लिन नपाएको गुनासो गरेका छन् ।

के.सी. लामिछाने