स्वास्थ्य संस्था स्थानीय तहमा समाहित भएपछि औषधिको अभाव

 

स्थानीय तहमा निर्वाचित जनप्रतिनिधिहरूले औषधि खरिद प्रक्रिया नजान्दा तथा अन्य कामका कारणले ध्यान पुर्‍याउन नसक्दा अहिले जिल्लाका अधिकांश स्वास्थ्य संस्थामा औषधिको अभाव देखिएको छ ।

सरकारले स्वास्थ्य, शिक्षा, कृषि पशुलगायतका सरकारी कार्यालयको बजेट स्थानीय तहमा पठाएको भए पनि खर्च गर्ने तौरतरिकाको जानकारी नहुँदा समस्या आएको हो ।

वाणगङ्गा नपा-७ कोपहवा, बुद्धभुमि नपा-४ बुड्ढीलगायत कपिलवस्तुका अधिकांश स्वास्थ्य संस्थाहरूमा आइरन चक्की, सिटामोललगायतका निःशुल्क वितरण गर्नुपर्ने औषधिहरूको अभाव देखिएको छ । स्थानीय तहबाट औषधि खरिदका लागी टेण्डर गर्नुपर्ने भएपनि टेण्डर हुन नसक्दा औषधि खरिदमा समस्या आएको जिल्ला समन्वय समितिका प्रमुख नारायण खनालले बताएका छन् ।

औषधिको अभाव हुन थालेपछि बुद्धभुमि नपाका मेयर केशवकुमार श्रेष्ठले ५ लाख रुपियाँसम्मका औषधि सोझै खरिदका लागि बजेट निकासा गरेको बताए । औषधि अभाव भएपछि अहिले स्थानीय तहहरूले औषधि खरिद प्रक्रिया सुरू भएको बताएका छन् । यद्यपी टेण्डरबाट औषधि खरिद गर्दा समय लाग्ने र सिधै औषधि खरिद गर्दा सेवाग्राहीले औषधिको मुल्य बढी तिर्नुपर्ने हुन्छ ।

स्थानीय तहमा बजेट आएपनि औषधिलगायत अन्य विषयमा जिल्ला स्वास्थ्य कार्यालय पनि मौन रहँदा तथा जनप्रतिनिधिहरूले पनि आफूलाई जानकारी नभएको विषय भन्दै बेवास्ता गर्दा औषधिको अभाव देखिएको स्वास्थ चौकीका कर्मचारी बताउँछन् ।

'जिल्लामा जाँदा औषधि छैन भन्छन् । गाउँपालिका/नगरपालिकामा जाँदा वास्ता गर्दैनन् । हामीले जनतालाई कसरी सेवा सुविधा दिने ?'-वाणगङ्गास्थित स्वास्थ चौकीका अहेब नन्दकिशोर यादवले भने । अहेब यादवका अनुसार अहिले स्वास्थ चौकीमा गर्भवती तथा सुत्केरीलाई प्रदान गर्ने आइरन चक्कीकोसमेत अभाव रहेको छ ।


नन्दराम पौडेल