समाचारहरू

जिल्लाका अधिकांश स्वास्थ्य चौकीमा औषधि अभाव भएको पाइएको छ । सरकारले ३६ प्रकारका औषधि स्वास्थ्य चौकीहरूमा निशुल्क पाइने बताएपनि अधिकांश स्वास्थ्य चौकीमा अभाव भएको हो ।

'आएका बिरामीलाई औषधि नै नदिइ फर्काउने गरेका छौँ ।'-सिम्जुङ स्वास्थ्य चौकीका इञ्चार्ज बलाराम पोखरेलले भने ।

त्यसैगरी स्ताकुमाझ लाकुरीबोट र सौरपानी गाविसका स्वास्थ्य चौकीहरूमा पनि औषधि अभाव रहेको छ । 'धेरै औषधि छैनन् ।'-सौरपानी स्वास्थ्य चौकीकी इञ्चार्ज अनिता पनेरुले भनिन्-'निशुल्क दिने औषधि पनि छैन । औषधि नभए किन स्वास्थ्य चौकी खोलेको भनेर बिरामी र्फकन्छन् ।'-उनले भनिन् ।

गोरखामा तीन ओटा प्राथमिक स्वास्थ्य केन्द्र र ६४ ओटा स्वास्थ्य चौकी छन् ।  भिटामिन बी, आइरन चक्की, झाडापखालाको औषधि पनि स्वास्थ्य संस्थामा नरहेको स्वास्थ्यकर्मीहरू बताउँछन् ।

जनस्वास्थ्य कार्यालयसँग दुई महिना अघि नै औषधि माग गरेपनि औषधि नआएको सिम्जुङ स्वास्थ्य चौकीका इञ्चार्ज पोखरेलले बताए । औषधि खरिदका लागी टेण्डर आह्वान गरेपनि अहिले सम्म कुनै टेण्डर नपरेको जनस्वास्थ्य कार्यलयका खिलनाथ सिम्खडाले बताए ।

'औषधि त पठाएका छौँ । भनेजति पठाउन सकेका छैनौँ ।'-उनले भने । औषघि खरिदका लागि दुई महिना अघि टेण्डर आह्वान गरिएको थियो । तर, रित नपुगेको भन्दै कसैलाई पनि टेन्डर पर्न सकेन । अहिले पुन टेन्डर आह्वान गरिएको जिल्ला जनस्वास्थ्य कार्यालयले जनाएको छ । औषधि खरिदका लागि स्वास्थ्य मन्त्रालयबाट ३३ लाख प्राप्त भएको पनि कार्यालयले जनाएको छ ।

हरिराम उप्रेती