समाचारहरू

ओखलढुङ्गाका स्वास्थ्य संस्थाहरूमा औषधि अभाव भएको छ । औषधि नहुँदा उपचार गर्न आउने बिरामीहरू स्वास्थ्य परीक्षण गरेर फर्कन बाध्य भएका छन् ।

रूम्जाटारमा रहेको जिल्ला अस्पताल, एक प्राथमिक स्वास्थ्य केन्द्र र ५४ स्वास्थ्य चौकीमा सरकारले निशुल्क बाँड्ने भनिएका औषधि अभाव भएको हो । दुई महिना अघिबाटै औषधि अभाव भएपछि सेवाग्राहीले निजी क्लिनिकमा गएर किन्नु पर्ने बाध्यता रहेको स्थानीयले बताएका छन् ।

औषधि नभएपछि दुर्गमका नागरिक सेवाबाट वञ्चित भएको खिजीदेम्वा गाउँपालिकाका अध्यक्ष वेदबहादुर रोक्काले बताए । उनले गाउँपालिकाभर औषधि अभाव भए पनि जिल्ला स्वास्थ्य कार्यालयबाट नपठाएको गुनासो गरे ।

उनले गाउँपालिकाभरि औषधि किन्न २ लाख रुपियाँजति रकम आए पनि कहिले खरिद गरेर, कति, कहाँ र कसरी बाँड्ने भन्ने अन्यौल रहेको बताए ।

औषधि नहुँदा बिरामीलाई रित्तो हात फर्काउनु पर्ने बाध्यता रहेको सिद्धिचरण नगरपालिका-८ को ज्यामिरे स्वास्थ्य चौकीका स्वास्थ्यकर्मी दिपक राजभण्डारीले बताए । जिल्लामा औषधि अभाव भएको विषयमा जिल्ला स्वास्थ्य कार्यालयका सूचना अधिकारी मोहन सुवेदीले विभागबाट औषधि दुई वर्षदेखि नआएकाले समस्या भएको बताए । उनले जिल्लामा दुई वर्षदेखि विभिन्न कारण देखाउँदै विभागले औषधि नपठाएको आरोप लगाए ।

उनका अनुसार यस वर्षो बजेट समेत स्थानीय तहमै निकासा भएकाले किनेर वितरण गर्न सकिने अवस्था नहरेको जानकारी दिए । स्थानीय तहले आर्थिक कार्यविधिलगायतका नीति नियमहरू पारित गरेर नियमित काम थालिनसकेकाले खरिदलगायत विकास निर्माणका काम थालेका छैनन् ।

शिवप्रसाद ढुङ्गाना