समाचारहरू

नौकुण्ड गाउँपालिकाको यार्सा स्वास्थ्य चौकीमा औषधि अभाव भएपछि बिरामीले सहज औषधि उपचार पाउन सकेका छैनन् ।

कोभिड–१९ सङ्क्रमणका कारण ज्वरो आउने, छाती दुख्ने समस्याले बिरामी भएर स्वास्थ्य चौकीमा पुग्दा पारासिटामोल जस्ता सामान्य औषधि सकिएको भन्दै स्वास्थ्यकर्मीले फिर्ता पठाएको स्थानीय नोर्बु लामाले बताउनु भयो ।

सरकारले स्वास्थ्य संस्थाबाट ३५ प्रकारका औषधि निःशुल्क प्रदान गर्ने भने पनि गाउँमा औषधि अभाव भएपछि सेवाग्राही मर्कामा परेका हुन् ।

नजिकै सामान्य औषधि किन्न पाउने ठाउँ पनि छैन । एक दिन लगाएर कालिकास्थान पुग्नुपर्ने बाध्यता रहेको स्थानीय च्याङबा लामाले बताउनुभयो ।

यार्सा स्वास्थ्य चौकीमा एक सातादेखि भाइरल ज्वरोका बिरामी बढेपछि दैनिक २०/२५ जना ज्वरो, टाउको दुख्ने समस्या लिएर सेवाग्राही स्वास्थ्य चौकी आउने गरे पनि अघिल्लो सातादेखि अधिकांश औषधि सकिएको यार्सा स्वास्थ्य चौकीका अहेब रामप्रसाद ढकालले बताउनुभयो ।

नौकुण्ड गाउँपालिका स्वास्थ्य शाखा प्रमुख अणप्रसाद पौडेलका अनुसार सरकारले निःशुल्क प्रदान गर्ने केही अत्यावश्यक औषधिहरू स्टोरमा समेत सकिएको छ । पौडेलले औषधि खरिदको प्रक्रियामा रहेकोले केही दिनमा अभावको परिपुर्ति हुने बताउनुभयो ।

हेमनाथ खतविडा