समाचारहरू

आमाछादिङमो गाउँपालिकाको हाकु स्वास्थ्य चौकीमा औषधि अभाव भएपछि बिरामीले सहज उपचार पाउन सकेका छैनन् ।

ज्वरो आउने, छाति दुख्ने समस्याले बिरामी भएर स्वास्थ्य चौकीमा पुग्दा औषधि सकिएको भन्दै स्वास्थ्यकर्मीले फिर्ता पठाएको स्थानीय सेते तामाङले बताउनुभयो ।

सरकारले स्वास्थ्य संस्थाबाट ३५ प्रकारका औषधि निःशुल्क प्रदानगर्ने भनेपनि गाउँमा औषधि अभाव भएपछि सेवाग्राही मर्कामा परेका छन् ।

नजिकै सामान्य औषधि पाउने ठाउँ पनि छैन एक दिन लगाएर सदरमुकाम धुन्चे पुग्नुपर्ने बाध्यता रहेको स्थानीय सेवाग्राही च्याङबा लामाले बताउनुभयो ।

चिसो बढेसँगै छाती दुख्ने, खोकी लाग्ने भएपछि मङ्सिर २२ गते स्वास्थ्य चौकी पुग्नु भएका लामाले पनि औषधि नभएपछि त्यसै फर्किएको बताउनु भयो ।

गत सातादेखि धेरै औषधिहरू सकिएकोले गाउँपालिकामा माग गरी पाएको हाकु स्वास्थ्य चौकीका अहेब सुनिल धौडेलले बताउनु भयो ।
उहाँले एक सातादेखि भाइरल ज्वरो तथा पखालाका बिरामी बढेपछि दैनिक २० देखि २५ जना ज्वरो, टाउको दुख्ने र पखालाका बिरामी स्वास्थ्य चौकी आउने गरे तापनि औषधि नभएर फर्काउनु परेको उहाँको भनाई छ ।

आमाछोदिङमो गाउँपालिका स्वास्थ्य शाखा प्रमुख निमा तामाङका अनुसार सरकारले निःशुल्क प्रदान गर्ने केही अत्यावश्यक औषधिहरू स्टोरमा समेत सकिएर खरिदको प्रक्रियामा रहेकोले केही दिनमा औषधि अभावको परिपुर्ति नहुने बताउनुभयो ।

हेमनाथ खतिवडा