स्वास्थ्य बीमा गरेपनि सेवा नपाएको बीमितको गुनासो 

  ०७५ पुस १८ गते

सोलुदुधकुण्ड नगरपालिका–५ का ४३ वर्षीया दावा शेर्पाले स्वास्थ्य बीमा गराएपनि स्वास्थ्य सेवा नपाएको गुनासो गरेकी छिन् ।

पेट दुख्ने र ज्वरोले सिकिस्त बनाएपछि उपचारका लागि पुस १७ गते जिल्ला अस्पताल फाप्लुमा पुग्दा औषधि तथा उपचार नपाएकोमा शेर्पाले गुनासो गरिन् ।

स्वास्थ्य बीमापछि बिरामी हुँदा ५० हजार रुपियाँ बराबरको औषधि उपचार पाउने भएपछि ०७४ फागुन २२ गते बीमा गराएपनि अस्पताल पुग्दा औषधि नपाएकोमा शेर्पाले चिन्ता ब्यक्त गरिन् ।

यस्तै स्वास्थ्य बीमा गरेबापत उपचार पाउने आशा बोकेका सोलुदुधकुण्ड नपा–११ की ४८ वर्षीय गोपाल कार्कीले स्वास्थ्य बीमा गराएपनि उपचार नपाएको बताए ।

एक सातासम्म शरीर सुन्निने भएपछि उपचारका लागि जिल्ला अस्पताल फाप्लुमा पुग्दा अस्पतालले सबै औषधि किन्न लगाएको पीडितको भनाई छ ।

औषधि खरिदका लागि अस्पताललाई भुक्तानी दिएको भएपनि औषधि खरिदमा ढिलाई हुँदा यो समस्या आएको बीमा बोर्ड सोलुखुम्बुका दर्ता अधिकारी प्रदीप बस्नेतले बताए ।

केही समयमा नै स्वास्थ्य बीमाको औषधि जिल्लामा आइपुग्ने जिल्ला अस्पताल फाप्लुका डा. मिङमार छिरी शेर्पाको भनाई छ ।


पासाङ्ग बम्जन तामाङ