समाचारहरू

डोल्पामा स्वास्थ्य बिमा अभिकर्ता नहुँदा जिल्लाका अधिकांश नागरिक स्वास्थ्य बिमाको पहुँचबाट बाहिर रहेका छन । आठ स्थानीय तह रहेको जिल्लामा बिमा अभिकर्ताहरूले काम गर्न छोडेपछि समस्या भएको जिल्ला स्वास्थ्य बिमा वोर्डका संयोजक राजन डाँगीले बताउनु भएको छ ।

जिल्ला स्वास्थ्य सेवा कार्यालय अन्तरगत स्वास्थ्य बिमा वोर्डका संयोजक डाँगीका अनुसार स्वास्थ्य बिमा गर्नेहरूमा महिला १ हजार ३ सय ७८, पुरुष १ हजार २ सय ८२ जना रहेका छन । हाल सम्म ६ सय ९४ घरधुरीका २ हजार ६ सय ६० जनाले मात्र बिमा गरेको स्वास्थ्य सेवा कार्यालयले जनाएको छ ।

बिमित मध्ये ज्येष्ठ नागरिक महिलाको सङ्ख्या ६५ र पुरुषको सङ्ख्या ५२ रहेको छ । अति गरिवीको सङ्ख्या पुरुष ४ र महिला ३ जना छन । यसै गरी पूर्णरुपमा अशक्त घरपरिवारका पुरुष ३७ र महिला ३६ जनाले बिमा गर्नु भएको छ ।

महिला स्वास्थ्य स्वयमसेविकाका १ सय ३ परिवारलाई सरकारले ५० प्रतिशत बिमा गरिदिएका छ । बाँकीलाई सरकारले सतप्रतिशत बिमा गरेको स्वास्थ्य बिमा संयोजक डाँगीले बताउनु भयो । त्रिपुरासुन्दरी नगरपालिका–१ की ७६ वर्षीया पुना देवी न्यौपानेले आफ्नो अहिलेसम्म स्वास्थ्य बिमा नगरिएको बताउनु भयो ।

उहाले भन्नु भयो हामी ज्येष्ठनागरिकलाई स्वास्थ्य बिमा गरिन्छ रे मेरो पनि गर्नु पर्यो बाबु भनेर स्वास्थ्य केन्द्र त्रिपुराकोटका इन्चार्ज रमेश केसीलाई भन्यो तर बिमा गर्ने मान्छे नै छैनन् पो भने । आठ ओटा स्थानीय तह रहेको जिल्लामा सदरमुकाम दुनै आसपासका ठूलीभेरी नगरपालिका र त्रिपुरासुन्दरी नगरपालिकाका केहि ज्येष्ठ पुरुष तथा महिलाहरूले बिमा गरेपनि अधिकांश पालिकाका नागरिकले स्वास्थ्य बिमा नगरेको जिल्ला स्वास्थ्य बिमा संयोजक डाँगीले जानकारी दिनु भयो ।

संघीयता लागुसँगै प्रत्येक पालिकाहरूमा स्वास्थ्य बिमा गराए बापत बिमितहरूको संख्याको प्रतिशतको आधारमा मात्र पारिश्रमिक पाउने गरी नियुक्ति गरिएका बिमा अभिकर्ताहरूले काम गर्न छाडेपछि समस्या भएको हो ।

त्रिपुरासुन्दरी नगरपालिकामा नियुक्ति पाउनु भएकी बिमा अभिकर्ता विवेचना गौतमले भनेको समयमा बिमितले बिमा नगरिदिने प्रत्येक वडामा जानु पर्ने तर पारिश्रमिक भनेको समयमा नपाइने भएपछि अभिकर्ता काम छाडेर शिक्षण पेशामा लागेको बताउनु भयो ।

स्वास्थ्य सेवा कार्यालयमा रहेको स्वास्थ्य बिमा बोर्ड अन्तरगत स्थायी संरचना नभएकाले स्वास्थ्य मन्त्रालयबाट काजमा एक जना र स्वाथ्य बिमा बोर्डबाट एक जना गरी दुई जना भएपनि एक जना दैलेखमा काजमा गएदेखि फिर्ता भएकाले पनि काममा समस्या भएको जनाइएको छ ।

विष्णुप्रसाद देवकोटा