स्वास्थ्य चौकीमा तीन महिनादेखि स्वास्थ्यकर्मी नहुँदा सेवाग्राही प्रभावित

  ०७३ चैत ३ गते

सर्केगाड गाउँपालिकास्थित स्वास्थ्य चौकीमा कार्यरत स्वास्थ्यकर्मी तीन महिनादेखि नहुँदा स्थानीय सेवाग्राही मर्कामा परेका छन् । उक्त स्वास्थ्य चौकीका स्वास्थ्यकर्मी ०७३ पुस महिनादेखि नहुँदा कार्यालय सहयोगीको भरमा स्वास्थ्य चौकी खुल्ने गरेको स्थानीयबासीले बताएका छन् ।

स्वास्थ्य चौकीमा एचए, अनमी, अहेब, ग्रामीण स्वास्थ्य कार्यकर्ता र मासिकासमेत पाँच जनाको दरबन्दी रहको भएपनि हाल कार्यालय सहयोगीले उक्त स्वास्थ्य चौकी खोल्ने र बन्द गर्ने गरेको र्सर्केगाड गाउँपालिका-२ का ओमप्रकाश जैसीले बताए ।

स्वास्थ्य चौकीमा औषधि भएपनि औषधि चिनेर दिने स्वास्थ्यकर्मी नहुँदा बिरामी रित्तो हात घर फर्कन बाध्य भएको स्थानीयबासीले आरोप लगाएका छन् ।

जिल्ला जनस्वास्थ्य कार्यालयका निमित्त कार्यालय प्रमुख ध्रुव सिंहले आफूलाई सो स्वास्थ्य चौकीमा स्वास्थ्यकर्मी नभएको विषयमा कुनै जानकारी नआएको बताउँदै यस विषयमा बुझ्ने प्रतिक्रिया दिए ।

उक्त स्वास्थ्य चौकीमा कार्यालय सहयोगी बाहेक अन्य कर्मचारी नभएपछि दुई दिनको पैदल बाटो हिँडेर सेवाग्राही उपचारका लागि जिल्ला सदरमुकाम जाने गरेका छन् ।


नन्द सिंह