समाचारहरू

स्थानीय तह पुर्नसंरचना पछि अपि हिमाल गाउँपालिकामा खटाइएका स्वास्थ्यकर्मी एक महिना हुँदासम्म गाउँपालिकामा पुगेका छैनन् । गत साउन १ गतेबाट कार्यालयमा हाजिर हुने गरी खटाइएका स्वास्थ्यकर्मी गाउँपालिका नपुगेका हुन् ।

अपि हिमाल गाउँपालिकाको लागि संयोजक बनाएर पठाइएका गोकुलेश्वर अस्पतालका जनस्वास्थ्य निरीक्षक भानदेव जोशी सम्पर्कमा नै नभएको आरोप छ । जिल्ला स्वास्थ्य कार्यालयबाट खटाइएका जोशी अहिलेसम्म गाउँपालिका कार्यालय नपुगेका हुन् । जोशी अहिले पनि गोकुलेश्वर अस्पतालमै रहेको गोकुलेश्वर अस्पतालले जनाएको छ ।

यस्तै सहायक कर्मचारीको रूपमा घुसा स्वास्थ्य चौकीबाट खटाइएको हेल्थ असिस्टेण्ट उमेश यादव एक दिन मात्रै गाउँपालिकामा हाजिर भएका छन् । साउन १ गते हाजिरमा चिनो लगाएर यादव सम्पर्क विहीन छन् । अपि हिमाल गाउँपालिकाका निमित्त कार्यकारी अधिकृत लक्ष्मणसिंह धामीका अुनसार यादवले एक दिन हाजिर गएर गएपछि सम्पर्कमा आएका छैनन् । कुनै काज विदा नजनाएरै यादवले गाउँपालिका छोडेका हुन् ।

यादव घर गएर साउन २६ गते घुसा स्वास्थ्य चौकी पुगेपनि गाउँपालिकामा सम्पर्क गरेका छैनन् । यादव साउन ३१ गते मार्मा गाउँपालिकामा हुने भनिएको क्षय कुष्ठरोगसम्बन्धी त्रैमासिक गोष्ठीमा गएको स्वास्थ्य चौकीले घुसाले जनाएको छ । उनीसँगै घुसा स्वास्थ्य चौकीमा काजमा कार्यरत अहेब मोहनदेव जोशी पनि गोष्ठीमै लटिनाथ आएका छन् ।

एउटै गोष्ठीमा दुई जना स्वास्थ्यकर्मी आएको बताइएपनि जिल्ला स्वास्थ्य कार्यालय दार्चुलाले भने गोष्ठीमा हेल्थ असिष्टेण्ट यादव नआएको जनायो । जिल्ला जनस्वास्थ्य अधिकृत शिवराज सुनारले घुसा स्वास्थ्य चौकीबाट जोशीमात्रै तालिममा सहभागी भएको जानकारी दिए । यादव अहिलेसम्म कसैको सम्पर्कमा छैनन् । हेअ यादव यसअघि पनि पटकपटक मनोमानी ढङ्गले विदामा जाने गरेको जिल्ला स्वास्थ्य कार्यालय दार्चुलाले जनाएको छ । 'यस पटक पनि गाउँपालिकामा जानकारी नगराएरै बाहिर गएको देखिएको छ ।'-सुनारले भने-'यादवलाई कारबाही गर्ने नगर्ने अधिकार गाउँपालिकाको हो ।'

स्वास्थ्य मन्त्रालयले देशभर परिपत्र गर्दै काज विदामा गएका कर्मचारीलाई १२ घण्टा भित्र कार्यालयमा हाजिर हुन पत्रचार गरेको छ । तर, जिल्लाका अधिकांश कर्मचारी काज र विदामा गएका छन् । साउन ३० गते मात्र जिल्ला दैवी प्रकोप उद्धार समितिको बैठकले सबै स्वास्थ्यकर्मीहरूले सम्बन्धित कार्यालयमा हाजिर भएर घरघरमा पानी सुद्धिकरणको लागि पियुस वितरण तथा बिरामीको रेखदेख गर्न निर्देश गरेको छ ।

अहिले जिल्लाभरी भाइरल प्रकोप बढी रहेको बेला अपि हिमाल गाउँपालिकाको स्वास्थ्य चौकी घुसामा स्वास्थ्यकर्मी नै छैनन् । स्वास्थ्य चौकी घुसामा ६ जनाको दरबन्दी भएपनि साउन ३१ गते एक जना स्वास्थ्यकर्मी समेत कार्यालयमा नभेटिएको अपि हिमाल गाउँपालिका स्थानीय रुकमणी जागरीले आरोप लगाइन् । बिरामी स्वास्थ्य चौकी पुगेर त्यसै घर फर्कन बाध्य भएको उनको आरोप छ । भाइरलका बिरामी दिनभर स्वास्थ्य चौकीसम्म पुगेपनि औषधि नपाएरै फर्किएका हुन् ।

कार्यालयमा कार्यरत हेअ उमेश कुमार यादव, अहे मोहनदेव जोशी तालिममा गएको बताइएको छ । यस्तै एक जना अहेब घुसामा रिक्त छ । दुई जना अनमी रहेकोमा विजया तामाङ आफै बिरामी भएर स्वास्थ्य चौकीमा हाजिर हुन नसकेको बताइएको छ । घुसामै भएपनि उनी बिरामी भएका कारण स्वास्थ्य चौकीसम्म जान नसकेकी हुन् । यस्तै अनमी लालु रोकाया लामो समयदेखि तालिममा खटिएकी  छन् । साविकको गाविसले नियुक्त गरेका अनमी पार्वती जागरी परीक्षा दिन भन्दै धनगढी गएकी छन् । स्वास्थ्य चौकी घुसामा कार्यरत कार्यालय सहयोगी धर्मदेव भट्ट काजमा खोप सेन्टर पारिबगरमा बस्दै आएका छन् ।

जनस्वास्थ्य अधिकृत सुनारले कर्मचारी खटनपटन गर्ने अधिकार गाउँपालिकामा गइसकेको भन्दै गाउँपालिकाले निगरानी गर्नुपर्ने बताए । 'मन्त्रालय र क्षेत्रीय निर्देशन अनुसार हामी पनि कर्मचारी फिल्डमा भए नभएको बारे जानकारी लिने काम गरिरहेका छौँ ।'-उनले भने ।

नरेन्द्रसिंह कार्की