समाचारहरू

लेकम गाउँपालिका–२ गराडीस्थित सर्मोली स्वास्थ्य चौकीमा खानेपानीको अभाव हुँदा सेवाग्राहीहरु मार्कामा परेका छन् ।

बर्थिङ सेन्टर र ल्याब समेत सञ्चालनमा रहेको सर्मोली स्वास्थ्य चौकीमा खानेपानीको अभाव भएपछि विरामी तथा सुत्केरीलाई समस्या भएको हो ।

कौवाटा खानेपानी आयोजनाबाट एक पटक स्वास्थ्य चौकीमा खानेपानी पुर्‍याको भएपनि हाल खानेपानी अवरुद्ध भएपछि स्वास्थ्य चौकीमा आउने सेवाग्राहीले सास्ती खेप्नु परेको स्वास्थ्य चौकी इन्चार्ज हर्कबहादुर पालले बताउनु भयो ।

खानेपानी आयोजनाको मुहान स्वास्थ्य चौकी भन्दा टाढा रहेको र पाइपलाइन बिच्छ्याइएको ठाउँहरु भिरपाँखा भएकाले खानेपानी आयोजनामा पटकपटक अवरुद्ध हुने हुँदा समस्या भएको स्वास्थ्य चौकी इन्चार्ज पालको भनाइ रहेको छ ।

विरामी र सुत्केरी हुन आउनेहरुका लागि पानी नहुँदा धेरै समस्या भएको स्थानीय मञ्जु कार्कीले दुखेसो पोख्नु भयो ।

उहाँले भन्नु भयो– ‘पानी नभए सरसफाई कसरी गर्नु । शौचालय जान र सफाइ गर्न समेत पानी छैन् ।’ स्वास्थ्य चौकी आउने सेवाग्राहीले घरबाटै पानी ल्याउनु पर्ने बाध्यता छ ।’

स्वास्थ्य चौकीमा पानीको व्यवस्था नभएपछि महिलाहरुले सबै भन्दा बढी सास्ती खेप्नु परेको स्थानीय पार्वती जोशीले दुखेसो पोख्नु भयो ।

उहाँले भन्नु भयो– ‘सरकारी स्वास्थ्य संस्थामा समेत पानी नहुँदा महिलाहरुलाई समस्या छ । बच्चा पाउन बर्थिङ सेन्टरमा जानै पर्‍यो । त्यहाँ समेत पानी छैन् । पानीको बारेमा स्वास्थ्य चौकीलाई पटकपटक गुनासो गर्दा पनि समाधान भएको छैन् ।’

स्वास्थ्य चौकीमा भएको खानेपानी समस्या समाधानको लागि पहल भइरहेको लेकम गाउँपालिका वडा नम्बर २ का अध्यक्ष शिवराज जोशीले बताउनु भयो ।

स्वास्थ्य चौकी व्यवस्थापन समितिका अध्यक्ष समेत रहनुभएका जोशीले खानेपानीको पाइप जडान गरेर पानी ल्याउने तयारी भइरहेको बताउनु भयो ।

नरेन्द्रसिह कार्की